At pesadu unu muntone de chèscias su pràngiu de mèrcuris coladu in un’albergo de Sàrdara – in prena zona arantzu – acanta ddoe fiant unas 40 persones tra polìticos e dirigentes mannos de sa Regione Sardigna.
Sa rebota est istada interrùmpida dae sa Guàrdia de Finàntzia, chi at identificadu deghennoe partetzipantes, is àteros imbetzes ant acudidu a si fuire pro non si fàghere connòschere. Unu de is chi si sunt fuidos diat aere brincadu dae sa bentana e si diat èssere istichidu in mesu a sa tupa pro s’iscrancare sa contraventzione de 400 èuros e prus che totu sa figura lègia.
Sa giustìtzia est valutende is giustificatziones donadas dae is presentes arribbados dae vàrias partes de s’Ìsula e sa Procura de sa Repùblica de Casteddu at abertu un’inchiesta, pedende a is capos de sa Guàrdia de Finàntzia una relatzione pretzisa de su chi est acontèssidu a Sàrdara.
A su chi s’ischit finas a immoe, calicunu at fatu una telefonada anònima a is finantzieris de sa Tenèntzia de Seddori, avisende de sa presèntzia de medas màchinas in su parchègiu de s’albergo. Difatis is normas contra su covid previstas pro sa zona arantzu non permitiant a is albergadores de serbire pastos a persones esternas non registradas.
In s’ora chi sunt essende a campu is nùmenes de is possìbiles polìticos e dirigentes presentes a su pràngiu, sunt medas is protestas de is vàrias fortzas polìticas. Calicunu partidu at publicadu comunicados acanta decrarant chi nemos de is esponentes issoro fiat presente a su “pràngiu de sa birgòngia”.
Su guvernadore de sa Sardigna, Christian Solinas, amargadu meda dae su fatu, diat èssere prontu a pigare provedimentos sèrios in is cunfrontos de is chi s’agataiant a s’ispuntinu.
Duncas, sa satzadura de Sàrdara arriscat de pònnere in trèulu partidos e majoria, finas a cando no at a èssere craridu su fatu e ognunu non s’at a pigare is responsabilidades suas. Su chi est capitadu, difatis, est una mancàntzia de rispetu de sa polìtica pro is sardos, in custu momentu de limitatziones e crisi chi sunt pesende meda subra sa populatzione e s’economia de su Paisu.
Attività realizzata col contributo della Regione Sardegna – IMPRENTAS 2020-2021. LR 22/2018, art. 22”