S’Itàlia de su fùbalu est resèssida a bìnchere 2-0 contra sa Lituania sa gara de is Cualificatziones pro su Mundiale chi s’at a giogare in Qatar.

Sa Natzionale at regortu noe puntos in is primas essidas, gratziàs puru a is vitòrias contra s’Irlanda de su Nord e sa Bulgaria, semper cun su matessi resurtadu de 2-0.

In s’ùltima gara is òmines de Roberto Mancini ant bìnchidu gràtzias a is retes de Stefano Sensi e Ciro Immobile.

Is Asulos no ant giogadu una bella partida, difatis sunt resèssidos a marcare is duos gol in su segundu tempus ebbia, e is lituanos non sunt un’iscuadra forte meda. In is partidas a in antis de custa s’Itàlia imbetzes aiat giogadu meda mègius.

Immoe is italianos cumandant su Girone C a in antis de s’Isvìtzera – a ses puntos cun una partida de mancu -.

In cabudanni, pro sa cualificatzione a su Mundiale, sa Natzionale ant a atopare is pròpiu isvìtzeros, ma prima s’ant a agatare in su Girone de s’Europeu chi at a cumintzare in mese de làmpadas. In custu turnu preliminare ddoe at a èssere sa Turchia e su Galles.

S’ùltima partida chi s’est giogada a Vìlnius contra sa Lituània, at a permìtere a is giogadores dae acabbare bene is campionados natzionales, e a pustis a pensare sena perunu anneu a is meses benentes, chi no ant a èssere fàtziles.

S’ispera de totus est chi is asulos potzant lòmpere a is Europeos sena dannu perunu, a manera chi s’allenadore Roberto Mancini potzat seberare bene is òmines de cunvocare.

Oramai su Mundiale bìnchidu dae s’Itàlia in su 2006 in Germània est unu regordu ebbia, pro cussu sa Natzionale at a proare a torrare a bìnchere calicuna cosa. Est ora de torrare a fàghere bisare is tifosos asulos.

Diat a èssere una cosa manna a beru pro totus, a pustis de custu ùrtimu annu e custos meses iscomunigados meda pro more de su Covid-19.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Sa muda de tres marineris, isperdidos supra un’isuledda attesu meda de Pikelot, in su mare Discansosu, at attiradu s’attentzione de su mundu intreu,trasformande una situassione de perigulu, in d’una istravanada istoria de iscampu e isperantzia.

Sa battalla insoro po s’iscampu, evidentziada dae sa determina e s’addelentu, po iscriere sa paraula “Help” supra de sa rena, usande fozzas de pramma, at mustradu sa fortesa de s’omine contra sas cuntrariedades pius urtimas.

Affundados in d’una battalla contra su tempus e sas fortzas accanidas de sa natura, sos tres piscadores ant mustradu unu coraggiu istravanadu e una capatzidade de adattamentu chi non si podet creere. Arroccados in d’isuledda po pius de una chida, ant affrontadu sas isfidas de onzi die cun detzisione, pappande nughes de cocco e buffande abba de unu puttu po bivere.

S’esperientzia insoro at mustradu a su mundu intreu, sa fortza de s’ipiritu de s’omine chi si est cumparadu cun sas pius tosta de sas proas. Sa cramida est bistada isparta dae sos de sas famiglias insoro, cando non sunt torrados dae Pikelot, faghinde partire una operassione de chirca e succursu manna meda, cun sas autoridades de Guam e sas fortzas militares de sos Istados Unidos.

Gratzias a s’interventu lestru meda e a sa determina de non dassare sas chircas, sos tres marineris isperdidos sunt
bistados assebertados e sarbados, mustrande s’importantzia de sa coperassione internatzionale in casu de emergentzias.

Prima de los aere recuberados, lis ant bettadu paritzos imboligos de iscampamentu e puru una radio po los ponnere in cuntattu e si assigurare chi isterent bene. Custas cosas, mustrant sa solidariedade e s’umanidade chi podent bessire a pizzu puru in sas situassiones pius critigas, cando sa vida de atteras personas est in perigulu. Est una trauda a sa generosidade e a sa cumpassione umana daenanti de una disgrassia.

S’istoria de sos tres marineris, isperdidos supra de un’isuledda isperdida in mesu de su mare Discansosu, no est solu unu contu de iscampu, ma puru una trauda a sa fortza de s’ispirutu de s’omine e a sa capatzidade de si adattare e binchere sas cuntrariedades. Est unu ammunimentu chi nos ammentat sa debbilesa de sa vida, e s’importantzia de addurare unidos e de accordu in situassiones de apprettu.

In su mentres chi sos marineris si accorrant cun sas famiglias insoro e torrant a incumintzare sa vida de onzi die, s’esperientzia insoro, chi non si podet creere at a sighire a ispirare e tzelebrare su podere de s’isperantzia de sa fortza umana affrontande sas isfidas pius mannas de sa vida.

S’istoria insoro at addurare unu faru de isperantzia po tottu cussos chi affrontant sas difficultades, mustrande chi cun sa determina e s’unione si podent binchere puru sas isfidas piu tostas.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22