Sa pisedda russa furada a pitzinna, est a beru Denise Pipitone? In medas dd’isperant, a pustis de chi una teleispetadora de su programma “Chi l’ha visto?” at signaladu a sa trasmissione sa presèntzia de una giòvana fèmina in Mosca, chi est istada furada cando fiat pitica e chi assimìgiat meda a Piera Maggio.

Sa pitzinna, agatada in su 2005 in s’istatzione de Rostov, a Mosca, fiat istada leada a un’orfanotròfiu e ddoe est abarrada finas a immoe.

Comente at afirmadu su legale de sa mama de Denise, su nùmene de sa giòvana est Olesya Rostova e non diat àere mai connotu sa famìlia sua, e cando a s’època fiat istada agatada, non fiat una pisedda chi aparteniat a su grupu nòmade, chi aiant afirmadu de dd’àere furada. Però non s’est mai ischidu dae cale logu.

Is indìtzios chi faghent pensare chi sa pisedda russa siat sa pitzinna furada a Mazara del Vallo sunt duos: sa matessi edade chi diat tènnere Denise e una tzicatritze suta de s’ogru mancu.

Su chi diat fàghere sa diferèntzia però, at a èssere su DNA, chi at a iscoviare is afinidades intre Piera Maggio e sa pisedda intrada in orfanotròfiu tra is 4 e 5 annos.

Su casu de sa pitica Denise aiat corpidu totu s’Itàlia, cando sa pisedda fiat iscumparta dae Mazara del Vallo, su mangianu de su 1° de cabudanni 2004, mentras s’agataiat in sa coghina rùstica de domo sua.

Si si trataret a beru de sa pitzinna italiana, diat restare s’arcanu de comente siat arribbada a Rùssia, ma mescamente chie nde dd’apat furada.

Preguntas chi si diant pònnere is incuirentes in unu segundu momentu, cando is proas sientìficas ant a dimustrare si Oleysha est a beru Denise Pipitone.

Un’istòria chi diat fàghere pònere medas preguntas, ma chi diat prenare de cuntentesa su coro de sa famìlia de cussa pipia de 4 annos chi no at mai isperadu de agatare.

Custu diat pòdere donare unu pagu de isperu fintzas a sa famìlia de Angela Celentano de Arola, pisedda de tres annos, iscumparta su 10 de austu 1996 in su monte Faito e mai prus agatada.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

S’Itàlia de su fùbalu bolet torrare a bìnchere contra sa Lituania sa gara de is Cualificatziones pro su Mundiale chi s’at a giogare in su Qatar.

Is òmines de Roberto Mancini, in is dies coladas, ant bìnchidu prima contra s’Irlanda de su Nord – cun su resurtadu de 2-0 gràtzias a is gol de Ciro Immobile e Domenico Berardi – e a pustis contra sa Bulgaria – semper 2-0 cun is retes de Andrea Belotti e Manuel Locatelli -.

Ses puntos chi ant permìtidu a sa Natzionale Asula de ghiare su Girone C paris cun s’Isvìtzera, chi pro is italianos est s’àversàriu prus istragosu.

Mancini est un’allenadore sàbiu e ischit chi at a tocare a lòmpere a sa partida contra is elvèticos binchende sa partida contra sa Lituania – chi s’at a disputare in sa capitale Vìlnius -. Custu pro ite s’Itàlia at a falare in campu contra is rujos-crociados sena perunu anneu.

Pro sa gara benente su técnicu de Jesi no at a tènnere a dispositzione una pariga dae giogadores pro infortùniu, ma semus seguros chi at a seberare bene is supridores.

In s’annu de is Europeos – ispostadu pro more de su Covid-19 – custas partidas ant a serbire a s’allenadore de sa Natzionale pro cumprèndere chie portare a custa cumpetitzione.

Is asulos ant a dèpere sarbare s’onore a su fùbalu italianu, pro ite ocannu is iscuadras italianas impignadas in is Copas europeas sunt istadas bogara a malu modu. Est abarrada feti sa Roma.

Oramai su Mondiale bìnchidu dae s’Itàlia in su 2006 in Germània est unu regodu ebbia, ma is òmines de Mancini est torradu s’apretu e sa gana pro torrare a bìnchere, e immoe tocat a torrare a fàghere bisare is tifosos asulos.

Diat a èssere una cosa manna a beru, a pustis de custu ùrtimu annu iscomunigadu pro more de su Covid-19, e unu sinnale de isperu pro torrare a lestru a sa normalidade.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”