In Sardigna is logos ispantosos non mancant a beru.

In custas dies coladas semus andados a Sòrgono a bìdere is perdas longas de su parcu archeólogicu de Biru de Concas.

Pro lòmpere a custu logu depimus pigare s’istrada chi dae sa bidda de su Mandrolisai colat in su Santuàriu de Santu Màuru e pustis una pariga de chilòmetru semus arribados.

In mesu a is montes imbusciados dae bellos padenteddos s’at a pòdere ammirare sa prus manna cuntzentratzione de perdas longas de su Mediterràneu.

Ph: Roberto Anedda

In custu tretu de Sardigna paret de intèndere chi sa terra siat sagrada, gosi comente dda intendiat is òmines antigos chi ant pesadu custas pedras.

Ma pro ite, prus de chimbemìgia annos a oe, is sardos antigos ant postu custas pedras pròpiu in custu logu?

De custos coròngios mannos, traballados dae picapedreris antigos, nche nde tenet prus de dughentos. De custos medas sunt galu istantàrgios, àteros corcados a terra e calicunu truncadu. De seguru medas àteros sunt carratzados e non si bient.

Ph: Roberto Anedda

Is pedras fitas galu a camba parent gherradores antigos postos guàrdia dae cussos logos e sunt orientados cara a ponente, acanta morit su sole.

Biru de Concas chi in medas cramant, o tzerimoniant, sa “Stone Age” sarda, non tenet nudda dae imbidiare a sa localidade inglesa.

Ph: Roberto Anedda

Antzis tocat a nàrrere chi a diferèntzia de comente ant fatu s inglesos in s’agabbu de s’Otighentos, inoghe is pedras s’agatant galu in sa matessi positzione de comente sunt istadas agatas.

Ph: Roberto Anedda

Ocannu, diat at èssere perfetu lòmpere a Biru de Concas peri pro una vacàntzia in seguresa, sena gente a incarcu, bidu su perìgulu semper presente de su Coronavirus, chi nos at a acumpangiare peri pro su tempus benidore – prima de fàghere a totus su vatzinu – .

Ph: Roberto Anedda

Pro cussos chi no ant bidu custos logos amus detzisu de pònnere calicuna fotografia.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Ph: Roberto Anedda

Ph: Roberto Anedda

Su Fèstival de Sanremo sighit a abarrare un’eventu isetadu e sighidu meda in totu Itàlia.

S’editzione 2021 de su Fèstival de Sanremo est andada in direta dae su 2 a su 6 de martzu e at bidu sa partetzipatzione de 26 artistas pro sa setzione Campiones e oto pro sa setzione Propostas noas.

Su fèstival de sa cantzone italiana at bidu sa vitòria de is Maneskin, banda rock de giòvanos romanos chi, a pustis de àere retzidu custu trofeu, ant a dèpere rapresentare s’Itàlia a s’Eurovision Song Contest, su cuncursu musicale europeu, in programma su mese de maju.

A su segundu postu s’est classificada sa còpia Fedez e Francesca Michelin e a s’ùrtimu iscaleri de su pòdiu Ermal Meta.

Su cantautore e rapadore Willie Peyote s’est agiudicadu su prèmiu de sa crìtica Mia Martini cun sa sua “Mai dire mai (Sa locura)”.

Su duetu formadu dae Colapesce e Dimartino at retzidu su prèmiu Lucio Dalla pro su petzu: “Musica leggerissima”.

Sa cantante Madame at bìnchidu su prèmiu Sergio Bardotti pro su mègius testu, cuddu de “Voce”, gasi comente su prèmiu Lunezia, pro su petzu de prus balore musicale-literàriu.

Ermal Meta binchet cun “Un milione di cose da dirti” su prèmiu Giancarlo Bigazzi e Davide Shorty, in gara tra is propostas noas, at bintu su prèmiu Enzo Jannacci.

In fines Gaudiano, si leat in domo su Leontzinu comente primu classificadu tra is Propostas noas.

Dignos de remenu is meres de domo Amadeus e Fiorello, chi sunt istados capassos de istentare is telespetadores in custu momentu istòricu difìtzile cunditzionadu dae su Covid-19.

Mancari su prus pagu dinari postu a disponimentu pro sa manifestazione, Amadeus est resèssidu a batire in su palcu medas personàgios famados, chi no ant fatu intèndere sa mancàntzia de is istellas internatzionales de is annos colados.

Non sunt mancadas mancu ocannu is polèmicas, chi faghet parte de su Fèstival, ma fiat pretzisu a donare unu sinnu de ripresa a totu su mundu de s’ispetàculu proadu meda dae custos meses de firmu e de limitatziones.

S’isperat chi s’annu chi benit Sanremo si potzat fàghere cun su pùblicu presente in su teatru de s’Ariston, un’ausèntzia chi s’est intèndida meda a beru.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”