Su benidore paret èssere prus probe, nessi pro cantu riguardat s’usu de is drones.
Tra pagu artziende s’ograda amus a pòdere bìdere medas aeroplanoeddos telecumandados chi carrant pachetes. Unu sinnu de is tempos chi càmbiant semper prus a sa lestra, cun “fatorinos” volantes chi arribbant a is domos nostras.
‘Sumeri: Si Salpa!’ est su nùmene de su progetu realizadu cun su Comunu de Torinu e D-Flight, sotziedade de su grupu Enav, in collaboratzione cun Leonardo e Telespazio, e cun s’autorizatzione de s’Enac – Ente Natzionale de Aviatzione Tzivile-.
S’esperimentu, su primu in Itàlia — e tra sos primos a su mundu — faghet parte de una sèrie de isperimentatziones chi punnant a cunsentire su trasportu de mertzes in modalidade aèrea in tratas finas de 50 km e cun modalidades de controllu de s’aeroplanu prus addae de sa lìnia de vista de su pilota. Su bisu: est cussu de carrare chèntinas de kg de càrrigu.
Sa tarea de Leonardo est cussa de torrare is tzitades prus funtzionales, sostenìbiles e ecològicas pro mèdiu de tecnologias noas, de impreare fintzas in situatziones de apretu, comente pro sa situatzione ligada a sa pandemia.
In su benidore s’at a dèpere perfetzionare sa tecnologia, creschende sa capatzidade de càrrigu e de automatzione de is aeroplanos impreados. A nde benefitziare is tzitadinos in tèrmines de lestresas in is cunsignas, costos e mescamente ismenguamentu de s’incuinamentu gràtzias a sa propulsione elètrica.
Craru ca at a èssere netzessàriu valutare arriscos e netzessidade de regulamentatzione: pro custu est istadu interessadu fintzas s’Ente natzionale aviatzione tzivile.
Pro su chi pertocat s’isperimentatzione in su setore de is drones: su mese de maju coladu fiat istadu presentadu s’impreu de drones a pilotàgiu remotu pro sanificare is ambientes tzitadinos.
Seguru ca su trasportu de is mertzes, atuadu in manera massitza in custa modalidade, diat pòdere cumportare unu càmbiu risolutu in su mercadu de su traballu. Cun sa recherta de figuras noas de traballadores e un’abasciamentu de su nùmeru de is postos de traballu, pro is professiones chi connoschimus.
Attività realizzata col contributo della Regione Sardegna – IMPRENTAS 2020-2021. LR 22/2018, art. 22”