A pustis de su disinnu de lege de sa Giunta regionale pro sa riorganitzatzione de sa presidèntzia e is assessorados chi diat a destinare ses miliones de èuros pro agatare 61 collaboradores, in medas sunt contrarios.
Bastat a pensare chi in sa petitzione contra su disinnu de lege in sa prataforma Change.org, promòvida dae sa ex consigera de Pirri, Rossella Pes, in una pariga de dies sunt istrada regortas cuasi 4 mitza firmas.
S’ex consigera pirresa, at iscritu in su testu de sa petitzione chi su sèberu de destinare 6 milliones de èuros pro fàghere custa iscuadra pro agiudare su guvernu de sa Regione, est lòmpida pròpiu in custa iscuta de tempus a ube sa Sardigna diat a dèpere detzìdere comente impreare is fundos pro gestire custa fase importante contra sa pandemia
In pagus oras personas medas sunt istadas de acordu cun Pes e ant rispostu a sa petitzione publicada in s’ispàtziu sotziale in sa rete.
Tocat a narrere chi sa Sardigna est bivende unu momentu lègiu a beru, cun medas famìlias chi sunt abarradas sena rèdditu, cun mìgia de istudiantes chi ant dificultade a atzèdere a sa didàtica a distàntzia pro sa mancàntzia de aparitzos eletrònicos o pro more de connessiones chi non sunt andendu meda bene, pro ite sa rete internet e is infrastruturas non sunt modernas.
In prus de s’àteru tzitadinos medas sunt espostos a sa cundidura e segundu Pes sunt arriscandu de afrontare sa maladia in unu sistema sanitàriu disorganizadu, chi est poderende gràtzias a su sacrifìtziu de su personale sanitàriu ebbia.
Sunt custos is motivos chi ant fatu aderire in medas a sa campagna de sa consigliera contra su disinnu de sa Giunta regionale pro suportare s’atzione issoro.
Fortzis ses milliones sunt tropu a beru, in custus tempos malos, pro ite is sardos sunt aispetandu unu pranu istraordinàriu chi rispondat a is apretos sotziales, econòmicos de is tzitadinos. At a èssere importante chi a lestru meda, sa Giunta torret a pensare s’organizatzione e sa gestione de una sanidade pùblica eficatze e investimentos pro agiudare s’economia.
Attività realizzata col contributo della Regione Sardegna – IMPRENTAS 2020-2021. LR 22/2018, art. 22