Su Casteddu at torradu a pèrdere, custa borta contra su Genoa pro 1-0. S’iscuadra est dae ses partidas de sighidu chi non lompet a sa vitòria in campionadu.
Seguru ca in custas garas at tentu aversàrios balentes puru, comente Atalanta e Milan, ma in àteras partidas, sa delusione est istada manna meda.
In s’istàdiu Marassi de Gènova, una rete de s’atacante Mattia Destro at detzisu sa partida, mancare is ruju-blu apant tentu prus de un’ocasione pro marcare unu gol. Is giogadores ant isperditziadu atziones de giogu bellas a beru e non sunt resèssidos mancu a paregiare.
Tocat a nàrrere chi a pustis de is primas partidas is tifosos casteddajos si sunt acuntentados de s’iscuadra de Di Francesco, e teniant isperu bonu de sighire in cuss’àndala. Ma dae una pariga de chidas a oe s’est cumpresu chi ocannu puru s’obietivu de su Casteddu est su de sighire abarrare Sèrie A.
Est pro custu ca a pustis de sa partida pèrdida eris, is tifosos s’ispetaiant su càmbiu de s’allenadore, imbetzes su presidente Tommaso Giulini at donadu galu fide a Eusebio Di Francesco. Difatis sa chida colada dd’at allonghiadu su cuntratu chi acabbaiat in su 2022, finas a su 2023.
Giulini at chistionadu in Sky de custa detzisione: “Amus cunfirmadu Di Francesco pro donare galu prus fortza a s’iscuadra. Tzertu oe non semus resèssidos a bìnchere e custa cosa nos dispraghet meda”.
S’allenadore abrutzesu a pustis at naradu: “So cuntentu meda chi sa sotziedade at bidu ca s’impignu e su traballu non sunt mancados. Immoe tocat a nois a torrare a pagare sa fide chi nos ant donadu”.
Sa partida chi benit est domìniga, in domo, contra su Sassuolo de Roberto De Zerbi. No at a èssere fàtzile pro ite s’iscuadra emiliana giogat bene a beru. Sa partida de s’andada fiat acabada 1-1.
Is òmines de Di Francesco sunt resolutos a giogare una bona partida in sa Sardinia Arena pro comintzare bene su Girone de torrada.
Is tifosos pedint chi is giogadores isulanos nde boghent a foras su caràtere issoro pro torrare a bìnchere e pro onorare sa màllia ruju-blu.
Attività realizzata col contributo della Regione Sardegna – IMPRENTAS 2020-2021. LR 22/2018, art. 22”