Est ufitziale, Joe Biden est su presidente nou de is Istados Unidos de Amèrica.
Su mere nou de sa Domo Bianca at giuradu in pitzu de una bìbbia antiga de prus de chentu annos, poderada dae sa mugere Jill, in dae in antis a su presidente de sa Corte Suprema, John Roberts.
Joe, a 78 annos lòmpidos, est su Presidente prus betzu de s’istòria americana a intrare in càrriga.
Imbetzes Kamala Harris est sa prima vitze-presidente fèmina, de orìgines afro-americanas e indianas, de s’istòria de is USA.
Is primas paràulas de Biden sunt istadas: “Custa est sa die de s’Amèrica, est sa die de sa democratzia, de s’istòria, de s’isperu, sa democratzia at bìnchidu”.
In deretura Biden at bòlidu torrare a cumpònnere cussa unidade natzionale indebilitada a pustis de is ùrtimos fatos chi ant portadu a s’invasione de su Campidògliu cun sa morte de calicunu de is “sighidores” de Trump.
Puntos càrdine de sa polìtica sua: sa defensa de sa costituzione e s’Amèrica. Est cumbintu chi is americanos potzant iscrìere una pàgina noa de s’istòria issoro fata de isperu. Unu faeddu chi at naradu prus de una bia in su discursu suo est istadu “coràgiu”.
Difatis su Presidente nou at naradu: “Pedo a totus is americanos de m’agiudare a unire su Paisu. Apo a pònnere totu s’ànima mea pro unire torra sa natzione, is USA tenent meda de fàghere in custu ierru de perìgulu, meda de acontzare e de sanare”.
“Faeddare de unidade — at sighidu su Presidente – podet pàrrere fantasia in custas dies. Isco chi is fortzas chi nos dividint sunt profundas e beras. E isco fintzas chi non sunt una novidade. Ma s’unidade est s’ùnicu caminu pro andare a in antis”.
Àteru fronte acanta Biden s’at a dèpere impinnare in deretura est cussu de s’apretu Covid-19.
At naradu su Presidente: “Su virus at mortu prus americanos de cussos mortos in sa Segunda Gherra Mundiale, ma ddu podimus bìnchere”.
Passu importante in s’arresonu de Biden fintzas sa luta contra su ratzismu e is disegualidades sotziales, e su problema de s’incuinamentu e is cambiamentos climàticos.
Dae totu su Mundu sunt lompende is atestados de istima e de cumpartzimentu de is programmas de su cursu nou de sa Domo Bianca. A Biden tocat su còmpitu difìtzile de fàghere ismentigare in presse is bator annos de Trump.
Attività realizzata col contributo della Regione Sardegna – IMPRENTAS 2020-2021. LR 22/2018, art. 22”