Sunt colados prus de tres meses, dae cando is locales pùblicos ant pòdidu torra abèrrere.
Ma custa chida in Itàlia est torradu a crèschere su nùmeru de is cundiduras. Sunt prus de 500 is persones chi ogna die resurtant positivas a su COVID-19.
In Sardigna medas casos sunt de turistas lòmpidos dae natziones istràngias, in ue sa maladia est foras de controllu. In prus is migrantes chi isbarcant in costas de su Sulcis sunt casi semper positivos a su Covid-19. Contra custu virus, chi sighit a s’ispainare in Àfrica e in is Amèricas, cun epitzentros noos peri in Àsia, tocat a abarrare semper a s’avèrtida .
In prus, in custa iscuta de tempus, a pustis de s’apretu de su COVID-19, s’est cumentzadu a cumprèndere ca sa gente non s’est cumportada in modu responsàbile.
Is prus ispensados sunt istados is giòvanos, chi ant trascuradu de si pònnere mascaredda pro amparare sa salude personale.
Bastat a pensare a cussu chi est capitadu a Carloforte – is dies coladas – in ue su contàgiu s’est iscasiddadu in discoteca.
Pro cussu tocat semper a abarrare abbistos contra custa pesta, e pro Mesaustu est pretzisu a si pònnere sa mascaredda e a castiare is règulas de s’istesiamentu personale.
Sa Regione Sardigna s’àtera die, cun s’ordinàntzia nùmeru 40 at donadu su permissu a is festas e a is protzessiones in su logu abertu, peri cun is caddos. Difatis medas sunt is biddas sardas chi ant a festare s’Assunta. Unu sèberu de su Presidente Christian Solinas chi est contra sa positzione de su Guvernu natzionale. Bastat a pensare a su chi at naradu su Ministru pro is afares regionales Francesco Boccia, difatis at ipotizadu chi su Guvernu at a ordinare, pustis iscurtadas totu is Regiones, de cungiare is locales noturnos pro s’iscialu.
Pro non pèrdere is resurtados otentos in is meses colados, fintzas gràtzias a is limitatziones severas e sacrificosas, tocat a sighire a rispetare is normas.
Pro ite, comente narant is espertos prus mannos de maladias contagiosas, no est beru ca su virus siat chitende sa càrriga virale sua.