Andamus a bìdere su tretu de sa lìnia galu cungiadu, Mandas-Arbatassa

In custas dies coladas semus andados a girollu in su tretu cungiadu de sa lìnia ferroviària Mandas-Arbatassa.

Is binàrios chi partint dae s’istatzione de Seui e lompent a sa de Gàiru, colende dae su sartu de Ussassa, est cungiadu dae medas annos, pro more de duos pontes de s’Otighentos chi no ant passadu su collàudu.

Pro is amantiosos de su Treninu Birde, sa ferrovia chi passat in custas biddas est cunsiderada sa prus bella de sa Sardigna.

Custu pro ite sa lìnia in custu tretu arribat a unu logu ìnnidu de bellesa rara, in mesu a is montes imbusciados dae padentes crosos, in ue est fàtzile a bìere muvrones, chervos, sirbones e àteras feras.

In custu logu ispantosu meda, no est raru a ammirare su bòlidu de s’àbbila chi faghet su niu in is bellos Tacos de sa zona.

In custu tretu de ferrovia matas mannas, a una parte e a s’àtera de is binàrios, òbiant is naes issoro faghende umbra e donende friscura a chie ddoe colat.

Non su Treninu Birde, chi comente amus naradu, ocannu puru no at biagiare in custa trata. Pro poderare biu su regordu de is chi ant bidu custos logos e pro ingangulitzare is chi non ddoe sunt mai istados, amus detzisu de pònnere calicuna fotografia.

Cun custa iscusa amus a bìdere peri a ite puntu sunt is traballos pro torrare a pònnere in seguresa is pontes chi is annos colados no ant passadu su collàudu.

Tzertu s’emergèntzia de su COVID-19 ocannu no at agiudadu a apressibire is cantieris, però tocat a nàrrere ca custa zona, pro medas cosas, paret iscarèssida dae totus e medas servìtzios pro sa populatzione sunt pighende s’àndala de su fumu.

Difatis, is impresàrios de su logu sunt cungende medas atividades in su setore de su turismu.

S’ispera est chi sa lìnia Mandas-Arbatassa siat aberta totu cantu prima, pro ite su Treninu Birde est perfetu peri pro una vacàntzia in seguresa, sena gente a incarcu, bidu su perìgulu semper presente de su Coronavirus, chi nos at a acumpangiare peri pro su tempus benente.