Sa Poesia Cantada in fines at agatadu domo in Silanos. At abertu is ghennas sua domìnigu coladu, in una die bella e intensa in presèntzia de is cantadores e de is amantiosos de sa poesia a bolu.
Pro giustu diat èssere istada aberta giai unos cantos meses a oe, sa Domo de sa Poesia Cantada, ma sa die est istada crastinada pro more de s’apretu de su COVID-19.
Si tratat de unu beru e pròpiu museu, chi permitit a su bisitadore de s’imbèrghere in su mundu de sa poesia de sa Sardigna, printzipiende unu biàgiu dae is orìgines finas a is dies nostras.
Su progetu de su biadu Paolo Pillonca e de s’Amministratzione comunale silanesa, at pigadu forma in sa domo Aielli.
Difatis custu palàtziu antigu est istadu postu a disponimentu a s’indonu dae su Comunu de Silanos a sa Domo Editora Domus de Janas de Fabio Pillonca, chi in is aposentos suos at postu in mustra is 50 annos de istùdios e de chirca fatas dae su babbu.
S’intelletuale mannu nàschidu in Òsile e mancadu pagu prus de duos annos a oe, fiat cunsideradu su màssimu espertu de sa poesia improvisada de s’Ìsula.
A s’internu de Sa Domo de sa Poesia Cantada s’agatant ispàtzios multimediales, cun pannellos prenos de fotografias e cun s’istòria illustrada de is prus mannos poetas sardos de su passadu.
In prus ddoe sunt setziones dedicadas a is poetas fèminas, a is cantadores de oe, a su cantu a tenore e peri a is diversas formas de poesia praticadas in totu su mundu. Est istadu fintzas cuncordadu unu palcu beru, in ue s’at a pòdere cantare e iscurtare is garas.
Sa tzerimònia de abertura est istada cummovente a beru. Sa feta ruja de inauguratzione est istada segada dae sa pobidda de Paolo Pillonca, paris is mugeres de duos cantadores silanesos, Mario Masala e Francesco Mura. Difatis Silanos est s’ùnica bidda de sa Sardigna a àere tentu, in su matessi tempus e pro prus de barantaghimbe annos de fila de pare, duos poetas improvisadores de primore: Francesco Mura e Mario Masala.
In Pratza Carraghentu obligatòria sa presèntzia de is poetas de su cantu a bolu, ghiados dae su prus betzu cantadore galu in vida, Bernardo Zizi de Oniai – norantaduos beranos -.
Paris cun su poeta mannu ddoe fiant Alessandro Arca e Salvatore Cappai de Silanos, Bruno Agus de Gàiru, Giuseppe Porcu de Irgoli, Tore Senes de Bonolva, Salvatore Scanu de Othieri, Nicola Farina de Orgòsolo, Dionigi Biti de Ulìana e Diego Porcu de Santu Lussurzu. Presente peri su tenore “Santu Larettu” de Silanos.
Su mere de domo, su Sìndigu Giampietro Arca, at retzidu is chi ant partetzipadu a s’eventu, tra issos peri s’assessora regionale a s’indùstria Anita Pili, is cussigeris regionales Roberto Deriu e Francesco Mura.
A s’agabbu de sa manifestatzione ddoe est istada una dibata, negotziada dae Anthony Muroni, chi at bitu s’interventu de medas espertos de poesia, comente Chiara Cocco, Giampiero Zolo, Maria Antonietta Nieddu, Gigi Litarru, Gigi Daga, Fabio e Pier Sandro Pillonca.
