Is boghes praeras lòmpidas a origras de is incuirentes ant fatu partire in deretura is chircas de unu corpus: in Orgòsolo totus ant pensadu deretu a Graziano Mesina.
Ufitzialmente Mesina est isbandiende dae su 24 de argiolas, ma est dae unu mese chi de issu non si nd’est ischidu prus nudda, est a nàrrere ae sa die chi su tribunale at donadu sa cunfirma de sa cundenna a 30 annos pro tràficu de droga.
Comente at iscritu s’Ansa, su nùcleu sommotzadores de is carabineris de Casteddu at iscandalliadu pro 5 oras su lagu artifitziale de Istichiò, in localidade Pradu, in Orgòsolo, ma su mortu no est istadu agatadu: su fundu de su lagu fiat prenu petzi de màchinas fuliadas. In is oras sighentes is chircas s’ant a ispostare a pagos chilòmetros prus addae, in su lagu de Olai,.
Dae su 2 de argiolas de Graziano Mesina non si nd’ischit prus nudda: politziotos e carabineris dd’ant chircadu a pedras pesadas in ogna angrone de Orgòsolo, in ogna domo e in ogna cuile. Ma is chircas ant interessadu totu sa Sardigna, prus che totu sa Gaddura, acanta Mesina tenet parentes, e in sa zona de Casteddu, in ue si pensat chi potzat tènnere gente de dd’agiudare.
S’est pensadu chi si nde diat pòdere èssere andadu peri foras de Sardigna o de Itàlia, a Còrsica o a Tunisia. S’est allegadu fintzas de una possìbile tratativa tra s’Istadu e is legales de s’ex bandidu, cun Mesina dispostu a si presentare a sa giustìtzia in càmbiu de un’iscontu de pena o de unu regìmene cartzeràriu prus lèbiu. Ma si tratat de boghes ebbia, bidu chi non ddoe est istada nissuna cunfirma ufitziale.
Sa chida colada s’orgolesu est istadu decraradu ufitzialmente latitante, a pustis de sa firma de su decretu pro manu de su presidente de sa prima setzione de sa Corte de Apellu de Casteddu Giovanni Lavena. Difatis fiat istada atzetada sa recherta de su Procuradore generale Francesco Nanni. S’àutu fiat istadu notificadu a is legales de Mesina: Beatrice Goddi e Maria Luisa Vernier.
Immoe est essida a campu sa boghe chi Mesina diat pòdere èssere mortu. Forsis nd’amus a ischire calicuna cosa in prus in is oras sighentes.