Si sunt fuidos dae su tzentru de acoglièntzia de Muristeni, mancari deperent abarrare in cuarantena pro s’apretu Coronavirus, e ant chircadu de furare in unu tzilleri a Sestu.

Unu de custos, unu migrante de 26 annos de natzionalidade algerina, est istadu arrestadu dae is Carabineris pro fura. Su cumpàngiu benit chircadu dae sa giustìtzia.

Su fatu, comente at iscritu s’agèntzia Ansa, est acontèssidu eris sero. Is duos extra-comunitàrios sunt intrados in su tzilleri-istancu e, in unu momentu segundu ant isprantzadu su plexiglass de su bancone, chirchende de nde boddire sa mercantzia.

Su mere at chircadu de ddos firmare, ma est istadu boddidu a corpos e a impèllidas. Is duos istràngios tando si nde sunt fuidos, sighidos dae su titulare chi in s’ora aiat mutidu su 112.

A pitzu de fua dae su Cpa de is migrantes in is dies coladas est istada presentada un’interrogatzione de su deputadu de Fdi, Salvatore Deidda.

Preocupada sa populatzione locale e non solu, a su puntu chi sa minoria de su Comunu de Muristeni at pedidu in deretura sa cunvoca de su Cussìgiu Comunale.

In una nota firmada dae Fenu, Loi, Cinus G. e Cinus M., is cussigeris ispiegant su motivu de sa rechesta de s’assemblea pùblica. Difatis in is ùrtimas dies, a parte sa fua de is istràngios in regìmene dae cuarantena e is reatos commitidos dae is migrantes, medas tzitadinos si sunt chesciados is retzes sotziales de esserent istados fintzas molestiados.

Duncas is cussigeris pedint chi is responsàbiles de custas atziones siant agatados e chi in is cunfrontos issoro siant pigados giustos provedimentos, pro more chi non torrent a acontèssere prus.

Su motivu de sa rechesta de su Cussìgiu Cumonale, in prus, est cussu de realizare a pilu e sinnu un’anàlisi de sa situatzione de is migrantes in su Cpa de Muristeni, pro more de redatzionare unu documentu de indiritzu de su Cussìgiu pro ddu intregare a is autoridades cumpetentes.

Tale atu diat dèpere impinnare sa Sìndiga Luisa Murru a esertzitare ogni atzione lìtzita de cumpetèntzia sua pro su mantenimentu de s’òrdine pùblicu e sa seguridade sanitària de sa populatzione de Muristeni e de in biddas a inghìriu fintzas paris cun s’Unione de is Comunos e is sìndigos de is Comunos lacanàrgios.

Tragèdia custu mangianu in Arborea, acanta un’allevadore at pèrdidu sa vida a pustis de èssere rùidu a s’internu de unu machinàriu mòbile pro s’imballàgiu de sa proenda.

S’òmine, 71 annos, s’agataiat a s’internu de s’azienda sua cando est sutzèdidu s’intzidente e galu nos s’ischit comente siat acontèssida sa disgràtzia.

S’imprendidore est mortu de corpu, a càusa de is fertas causadas dae sa rutòrgia. A si nde sapire de su chi fiat sutzèdidu unu prepostu a su ritiru de su late.

In deretura sunt lòmpidos su personale de su 118, carabineris, vìgiles de su fogu e ispetores de s’Assl. Como is autoridades ant a dèpere istabilire is càusas de custa morte bianca, chirchende de cumprèndere si s’òmine siat rùidu a s’internu de sa màchina agrìcula pro malasciagura o pro unu malore.

Sa vìtima Giuseppe Schiavon – paris cun su fìgiu Marco – gestiat un’azienda zootècnica de una chentina de pegos. In lutu sa comunidade de Arborea, acanta s’òmine fiat meda connotu e istimadu.

Custu dramma est s’ùrtimu de is medas disacatos capitados in su setore de s’agricultura. Fintzas ocannu in Sardigna, sunt istados medas is chi sunt mortos traballende in su sartu.

Is datos de is mortes e de is feridos in su traballu acontèssidos in Itàlia sunt lègios a beru. In is ùrtimos deghe annos sunt belle 18 mìgia is chi ant pèrdidu sa vida traballende. Imbetzes is traballadores chi sunt abarrados fertos sunt prus de 600 mìgia.

Medas is maniales agrìculos, medas de cales sunt abarrados interessados in intzidentes cun is tratores chi si nche sunt furriados tenende de suta is pòberas vìtimas.

Intzidentes chi depent fàghere leare provedimentos pretzisos a is autoridades e a su Ministru de is Polìticas Agrìculas Teresa Bellanova.

Pròpiu sa ministra – ex sindacalista- est semper istada sensìbile a custu tema chi corpit unu setore gosi importante de s’economia natzionale.