PH: Roberto Anedda
Ocannu is sardos ant a pòdere aprofitare pro biagiare in s’Ìsula issoro, pro evitare atropèlliu de gente. Su cussìgiu nostru est su de andare e connòschere custos logos ispantosos meda.
A coa de custa chida colada, amus bisitadu una pariga de plajas e àteras localidades in su sartu de Crabras in provìntzia de Aristanis.
In custas dies non semus istados ditzosos meda, tzertu, pro ite su bentu maistru fiat forte meda, e at artziadu undas mannas e minetzosas.
Però sa bellesa de is plajas e is colores bellos de su mare, nos ant prenadu su matessi su coro de felitzidade.
PH: Roberto Anedda
Mancari su bentu forte, is turistas fiant presentes e ant rispetadu su tretu de seguresa, segundu is disponimentos contra su COVID-19.
Su sartu de Crabas est unu logu de bellesa rara, e ricu de istòria. In custa ocasione pro more de su pagu tempus, non semus renèssidos a bìdere totu is prendas de su custa zona de Sardigna. Diant a serbire dies medas, pro ite ogni bìculu de custa cussòrgia at cosa chi mèritat de èssere bida.
PH: Roberto Anedda
Sa primu plaja a ue semus andados est istada sa prella de sa penìsula de su Sinis: Is Arutas. In custu logu ispantosu su mare basat is raneddos de pedra arba colorada, chi assimìgiat a pibioneddos de risu.
PH: Roberto Anedda
Su mare in custu arenile est colore de su chelu chene nues, comente in s’àtera plaja in ue semus istados a pustis: Maimone. Pro arribare a custu logu, tocat a fàghere un’àndala isterrada longa meda.
PH: Roberto Anedda
A sighire, amus bisitadu sa biddighedda de Santu Sarbadore, famadu pro sa Cursa de is Iscurtzos. Unu bidditzolu medievale, nàschidu subra un’ispàtziu sacru nuràgicu e immoe impreadu comente logu de ambientatzione pro su tzìnema western.
PH: Roberto Anedda
In particulare cussigiamus de bìdere sa gruta a suta de sa cresiedda de Santu Sarbadore.
Pro chie at a bòlere chircare un’àteru logu antigu, at a bastare andare pagu prus a largu e sighire s’istrada conca a Mari Ermi.
PH: Roberto Anedda
Inie s’agatat s’iscavu de Monte Prama, in ue ant agatadu is Gigantes, immoe costoidos in parte in su museu de Crabas e parte in Casteddu.
PH: Roberto Anedda
Cussigiamus puru de bisitare sa plaja de Santu Giuanne de Sinis – fratzione de Crabas – cun is areniles lìmpidos e lughentes che s’oro. A làcanas de sa plaja s’agatat sa tzitade antiga de Tharros chi non tenet bisòngiu de èssere presentada.