Chenàbura a merie s’intzidente cun s’autocarru in is caminos de Pienza – Siena -, in ue Zanardi fiat currende cun sa bitzicleta a manu sua.
Una tapa disfortunada de s’istafeta “Obiettivo Tricolore”, sa manifestatzione a iscopu solidale ma in modu dimustrativu ebbia, comente sinnu de rinàschida de s’isport italianu e de su mundu paraolìmpicu, corfidos meda dae s’apretu Covid-19.
S’ex pilota de fòrmula unu, leadu cun s’elisucursu a s’ispidale, est istadu operadu a conca e ricoveradu in su repartu de terapia intensiva.
Is cunditziones clìnicas suas, a pustis de tres notes de deghèntzia in terapia intensiva, non ant tentu variatziones. Sa situatzione abarrat uguale, cun is paràmetros càrdio-respiratòrios e metabòlicos istàbiles.
A s’imbesse su cuadru neurològicu est grave, comente at naradu su bulletinu mèigu de mesudie. Segundu su comunicadu, su malàidu est sedadu, intubadu e ventiladu in modu mecànicu e sa prògnosi abarrat riservada.
In su mentres sighint is averiguamentos pro cumprèndere su chi est capitadu. Andant a in antis is interrogatòrios pro connòschere sa dinàmica de s’intzidente de Zanardi e comente s’est acumprida sa tapa de “Obiettivo Tricolore”. Sa primu cosa de istabilire est si sa manifestatzione isportiva fiat regulare e si esseret garantida sa seguridade pro is partetzipantes.
Is mèdicos non s’atrivint a nàrrere cando e si su campione bolognesu si nd’at a ischidare, ogni valutatzione est rimandada a is dies imbenientes.
Is ammiradores de totu su mundu de s’atleta italianu abarrant in pensamentu cun s’ispera chi dae is bulletinos mèdicos arribbent bonas noas.
Diat serbire un’àtera “impresa” comente sa de su 2001, cando su pilota bolognesu aiat pèrdidu is cambas in Germània in un’intzidente malu durante una gara automobilìstica
Tando a pustis de 16 operatziones e 7 arrestos cardìacos, Zanardi est torradu a nàschere gràtzias a sa bitzicleta a manu e a sa fortza de ànimu sua. Cun sa risolutesa e su coràgiu suo, su binchidore de sa CART 1997 e 1998, at incumentzadu una “segunda vida” e est divenidu un’esèmpiu e un’ispiratzione pro medas.
Fortza Alex, torra a nos ispantare ancora, sunt galu medas is làcanas chi podes giumpare.