Su Casteddu at a èssere de iscena cras contra s’Hellas Verona, chi at a bìdere s’esòrdiu – in gara ufitziale – de Walter Zenga.
Una gara particulare tando, sa prima sena su tècnicu Rolando Maran, esoneradu a is primos de martzu, a in antis de s’apretu COVID-19.
Su Casteddu si presentant cun una formatzione de emergèntzia, bida s’ausèntzia de duos ponteddos de s’iscuadra comente Nainggolan e Joao Pedro. Su belga est foras pro neghe de unu dolu musculare, mentras su brasilianu depet iscontare una die de iscualìfica. No ant a giogare nemmancu su difensore Faragò, su tzentrucampista Oliva e su cunvalescente Pavoletti.
Medas is intzertesa in sa trasferta vèneta pro su Casteddu. Primu de totu non s’ischit cale at a èssere sa cunditzione fìsica de s’iscuadra, pro more de is meses chi is atletas non si sunt pòdidos allenare totu paris, problema chi tocat fintzas su Verona. In prus ddoe tenet dudas pro su possìbile mòdulu de is sardos, bìdidos is probàbiles càmbios de Zenga in difesa e a tzentru-campu.
Podet èssere chi s’iscuadra gioghet cun bator difensores in su repartu arretradu, tres tzentrucampistas in mediana e unu trecuartista a palas de sa còpia de atacu. Custu ùrtimu est su repartu chi tenet prus pagu sèberos a disponimentu, cun Simeone e Pereiro chi cun prus probabilidade ant printzipiare giai dae su primu minutu de sa partida.
S’Hellas est un’iscuadra matanosa meda de afrontare, massimamente in domo, e rapresentat sa bera rivelatzione de su campionadu de ocannu. Is armas mègius de is pitzocos de Juric sunt su pallègiu a tzentru-campu e sa solidesa difensiva.
Su regulamentu nou chi at a èssere atuadu in custas ùrtimas partidas de su campionadu, cunsentint 5 càmbios. Est possìbile chi durante sa partida, s’ex portieri de s’Inter e de sa Natzionale, potzat propònnere carchi giogadore interessante de sa Primavera de su Casteddu.
Is giòvanos Landinetti, Lombardi e prus che totu Carboni, tenent s’ocasione de apetigare su retàngulu birde de s’istàdiu veronesu.
A is iscuadras de Sèrie A ddis aspetat unu perìodu difìtzile meda, acanta s’at a calare in campu ogni tres dies, e pro custu at a serbire sa disponibilidade de totu is giogadores de sa rosa.
Pro sa sotziedade custa at a èssere un’ocasione pro valutare medas giogadores e pro fàghere is sèberos de mercadu pro s’istajone chi benit.