Contu a s’imbesse pro sa prima gara de su fùbalu professionista italianu, a pustis de su firmu impostu dae is limitatziones Covid-19.
Sunt colados prus de tres meses dae cando s’est giogada s’ùrtima partida de Sèrie A, cun in campu Sassuolo-Brescia, acabada 3-0.
Sa partida chi at a sinnare s’incumentzu nou de s’istajone, at a bìdere in campu Juventus e Milan, in sa semifinale de torrada de Copa Itàlia. A s’andada, in su campu de San Siro, su resurtadu finale est istadu 1-1, cun su vantàgiu de Rebic pro is ruju-nieddos, e su parègiu de is biancu-nieddos cun unu rigore de Ronaldo a s’agabbu de sa partida.
Ma ddoe tenet una novidade: in casu de paridade non s’at a andare a is tempos suplementares, ma deretu a is rigores.
S’àtera semifinale Napoli-Internazionale s’at a giogare sa die sighente, su 13 de mese de làmpadas in s’Istàdiu San Paolo. In custa gara is lombardos ant a dèpere recuperare su gol de Ruiz, in favore de is partenopeos , chistidu in sa gara de andada.
At a èssere curiosu meda a bìdere is cartzadores torra in campu pro giogare una partida bera de noranta minutos, a pustis de medas meses de firmu e cun is allenamentos colletivos torrados a cumintzare dae pagu tempus.
Medas is infortùnios de custas chidas, e pro custu, s’est valutadu de evitare de giogare possìbiles tempos suplementares.
Fintzas su Casteddu de Zenga at pagadu custu incumentzu disavesadu de su campionadu, cun s’istropiamentu de su belga Nainggolan. Su forte tzentrucampista, in prèstidu dae s’Inter, at tentu unu dannu musculare a unu cambile e at a brincare sa gara a su Bentegodi de su 20 de làmpadas. Unu discàpitu lègiu pro s’ex portieri de sa Natzionale de Itàlia ’90, bidu s’importu chi tenet in s’iscachiera tàtica de s’iscuadra.
Sa partida contra su Verona, at a èssere su primu esòrdiu de Zenga in sa banchita de su Casteddu, bidu chi a pustis de èssere intradu a su postu de Maran, su campionadu est istadu suspèndidu a càusa de sa pesta de su coronavirus.
Sa partida contra is iscalìgeros no at a èssere fàtzile, s’iscuadra rivelatzione de su campionadu uguale a su Casteddu in sa prima parte de s’istajone. In prus de s’ausèntzia de Nainggolan, s’allenadore milanesu at a dèpere fàghere a mancu peri de su cannoniere de is ruju-blu, Joao Pedro, chi at a brincare su disafiu essende iscualificadu.