Non ddoe at galu nudda de ufitziale, ma dae una pariga de chidas is amantiosos de su pugiladu non bient s’ora de ischire si custas noas siant beras.
Semus allughende de su disafiu tra Mike Tyson e Evander Holyfield, duos de is mègius pùgiles de is annos otanta e noranta. Is pugilistas americanos si sunt giai afrontados in su tempus coladu, e at semper bìnchidu Holyfield. Sa prima borta – in su 1996 – vitòria pro KO, imbetzes sa segunda – in su 1997 – pro more de s’iscualìfica de s’aversàriu.
In cust’ùrtima ocasione, Tyson – in sa de tres ripresas – nd’aiat ispitzigadu cun unu mòssiu unu bucone de origra de Holyfield, e nde dd’aiat ispudadu a terra.
Pro custa atzione “Iron Mike” est istadu iscualìficadu pro meda tempus e dd’ant suspèndidu sa litzèntzia pro gherrare in is cumpetitzione ufitziales.
Ma dae unos cantos meses Tyson est torradu a s’allenare bene meda, e paret chi siat torradu a sa cunditzione fìsica de cando fiat giòvanu. Pro custu motivu Mike at pensadu de cuncordare un’incontru de pugiladu pro benefitzèntzia.
Fatu fatu est nàschida s’idea de un’àteru disafiu cun Holyfield, chi in is ùrtimos annos est divènnidu un’amigu de Tyson.
Holyfield at naradu chi est prontu a batalliare contra s’aversàriu istòricu suo, e est seguru de bìnchere custa bia puru.
Pro immoe is vìdeos de is allenamentos dae Tyson ant ispantadu meda de prus de is de Holyfield. “Iron Mike” paret prus lestru e forte de s’ex rivale.
Semus allughende de duos ex pugilistas chi non sunt prus “pitzinnos”: Mike est de su 1966 e Evander est peri prus mannu, de su 1962.
Ma non tocat a s’ismentigare chi sunt istados duos campiones de su mundu de is pesos màssimos. De seguru Mike Tyson, pro su balentia chi aiat comente pùgile, diat àere bìnchidu meda de prus chi no esseret pro totus cussos problemas chi at tentu foras dae su cuadradu.
Immoe sa “botza” est colada a is rapresentantes dae is ex pùgiles. Ant a dèpere detzìdere issos tempos e modos pro torrare a bìere galu Tyson contra Holifield.