Noas malas pro su ministru britànnicu chi at sighidu a s’intèndere male a pustis de su cuntàgiu de COVID-19.
Bo Jo, comente benit mutidu, aiat cumentzadu a si curare in domo, ma is cunditziones suas sunt andadas male ca peus e s’est dèpidu ricoverare.
Mancari gasi, fontes ufitzilales de su guvernu, faghent a ischire chi non b’at de s’apensamentare.
Boris Johnson est istadu ricoveradu in ispidale “pro esàmenes”, 10 dies a pustis de èssere resurtadu positivu a su coronavirus. Su ministru britànnicu no at superadu in custas dies sos sìntomos, sighende a tènnere calentura e tussu.
Su mèigu suo dd’at cussigiadu su ricòveru in ispidale pro si sutapònnere a esàmenes”, at naradu unu portaboghe de Downing Street, chi at assiguradu chi si tratat petzi de unu premunimentu, bidu chi sa maladia non dd’at donadu ega. Boris Johnson, at agiuntu su portaboghe, “torrat gràtzias a su personale de su Nhs (su servìtziu sanitàriu natzionale britànnicu) pro su grandu traballu chi est acumprinde e invitat sa populatzione a sighire a pilu e sinnu sa racumandatzione de su guvernu de abbarrare in domo”.
In s’ora sa Reina Elisabeta at faeddadu a sa Natzione. “Bos allego in un’ora difìtzile: isco chi est unu ratu de tempus treuladu pro sa vida de su paisu nostru, chi a calicunu at causadu dolore, problemas econòmicos a medas e cambiamentos in sa vida de totus ”. Custos is faeddos de sa reina Elisabeta, 94 su 21 de abrile, durante su messàgiu televisivu suo a sa natzione pro s’apretu de su coronaviru, discursu registradu in is dies coladas in su casteddu de Windsor, antitzipadu dae sa corte a is mèdias in is ùrtimas oras e andadu in unda eris sero in is domos de milliones de britànnicos.
Sa reina Elisabeta – durante s’arrejonu televisivu, su de bator de su rennu suo, trasmìtidu fintzas in is Paisos de su Commonwealth – at indanimadu is sùdditos suos pro parare fronte a su coronavirus, cun s’ispetu chi totus si cumportent in modu de pòdere èssere “orgogliosos in sos annos benentes”.