S’Amministradore Delegadu de sa Apple, Tim Cook, at fatu a ischire ca sa sotziedade sua at donadu belle 7 milliones de dollaros a sa Tzina.
Sa summa, 50 milliones de yuan, at andare a sa sanidade de s’istadu asiàticu. Su rapresentante de su colossu americanu dd’at fatu cun una nota pubblicada in sa retza sotziale Weibo, su Facebook tzinesu.
Sa lassa de sa Apple, partzida in duas partes, est istada firmada in favore de sa Fundatzione tzinesa chi s’òcupat de sa lota a sa poberesa.
Sa prima parte, 20 milliones de yuan, est destinada de is ispidales de s’Hubei, sa provìntzia tzinesa malassortada chi est istada sa prus corfida dae s’epidèmia de Covid-19.
Sa segunda imbetzes, 30 milliones de yuan, est istada donada a sa sanidade de s’istadu asiàticu comente agiudu pro afrontare is meses sighentes e cussos chi ant a bènnere a pustis.
Unu gestu importante, cussu de sa Apple, prus che totu si si cunsiderant is raportos malos tra Istados Unidos e Tzina in su setore istratègicu de sa tecnologia. Bastat a pensare a is brigas tra is duas potèntzias mundiales pro sa chistione de Huawei.
Cook nd’at aprofitau pro bantare s’ispìritu de resistèntzia e resilièntzia mustradu dae su pòpulu tzinesu corfidu dae s’epidèmia de coronavirus. In prus at bòlidu torrare gràtzias a is dutores de sa Repùbblica Pobulare pro su bonucoro e su coràgiu mustrados dutante s’apretu, chi sunt istados de esèmpiu pro su Mundu.
Giai in sa metade de su mese martzu, totu is butegas de sa Apple in Tzina, a pustis de sa serrada pro s’epidèmia de su Covid-19, aiant torradu a abèrrere, fintzas si pro pagas oras a sa die.
Is 42 butegas cungiadas a su cumintzu de freàrgiu coladu sunt istadas torradas a abèrrere cun medas impestu a càusa de is limitatziones severas impostas pro s’atrèmenu de s’infetzione. Giai in sa prima chida de martzu fiant 38 is butegas abertas. Is ùrtimas bator butegas ant torradu a abèrrere in sa metade de su mese coladu, comente si podet lèghere in su situ internet de sa sotziedade americana.
S’epidèmia aiat corfidu meda sa domanda de is produtos a màrchiu Apple in Tzina, cun disacatos graves pro sa sotziedade americana, bida sa mannària de su mercadu tzinesu.