Fintzas in custu perìodu de apretu mannu e de netzessidade, non mancant chie chircat de nd’aprofitare de sa bonafide de sa gente.

Sa Sardigna puru non si dda sarbat, ma pro fortuna custa borta s’est evitadu chi sa malafadia andaret in portu.

Durante su normale controllu fitianu de is prataformas de is retzes sotziales prus connotas, is investigadores de s’Iscuadra Mòbile ant iscobertu chi in una cunversatzione de Instagram de una butega tzinesa beniat propagandada sa bèndida de mascareddas protetivas: 10 fatzoleddas a su prètziu de 50 èuros.

Postos in suspetu, is politziotos ant mutidu su bendidore a su telèfonu faghendesi bìere interessados a comporare sa mertze e dd’ant donadu apuntamentu in bia Santa Gilla.

In su logu e a s’oràriu atatzadu, s’est presentadu a s’abocamentu unu tzitadinu tzinesu chi giughiat una busta cun 3 cunfetziones de 10 mascareddas monousu de colore biancu sena informatziones e denumenatzione legale de su produtu, nùmene, ragione sotziale, màrchiu de su produtore o importadore UE/UE, orìgine, e marchiatura de calidade CE.

Is politzotos, bida s’irregularidade, ant fatu inghesta in domo de su tzitadinu tzinesu, classe 1970, e ant agatadu àteras 550 fatzoleddas de su matessi casta.

Totu is mascareddas sunt istadas secuestradas e su butegheri multadu.

Gràtzias a is fortzas de s’òrdine est istada evitada sa bèndida de custos dispositivos de protetzione individuales de provenièntzia suspeta e non cunformes a is normativas UE.

Si cunsìgiat semper de impreare petzi is mascareddas comporadas in butegas fidadas e seguras, chi garantant su rispetu de is normas.

In prus, si subenit ca est possìbile a comporare mascareddas a bonu prètziu in is vàrias aziendas regulares isolanas chi ant cunvertidu sa produtzione issoro a pustis s’ispàinamentu de s’epidèmia.

Difatis, peri in Sardigna, medas voluntàrios sunt donendesi ite fàghere pro chircare rimediare a sa mancàntzia de dispositivos de protetzione individuale.

Noas mannas in s’inchiesta pro sa morte de is duos frades calabresos. Davide e Massimiliano Mirabello, chi mancant de domo dae su 9 de freàrgiu, diant èssere istados mortos dae Joselito e Michael Marras.

Oe is carabineris de su Nùcleu Investigativu de su Cumandu Provintziale de Casteddu, ant arrestadu is bighinos de domo de Patiolla.

Is indàgines si sunt cuntzentradas in deretura subra babbu e fìgiu, pro ite fiant a briga cun is duos frades de ratza calabresa.

In passadu ddoe sunt istados chertos lègios meda tra issos, comentzados cando unu cane de is frades Mirabello est istadu agatadu impicadu.

Is calabresos ant semper imputadu de cust’afrontu is duos allevadores , acusados fintzas de ddis àere postu fogu a una barraca cun unu motocarru a intro.

Pustis custos fatos is frades Mirabello aiant detzìdidu de si vengare contra Joselito Marras iscudende·lu meda.

Pro more de custa carda lègia su bighinu nche fiat acabbadu a s’ispidale, acanta dd’aiant diagnosticadu medas feridas e curas pro baranta dies.

A su chi narant is investigadores, in s’ùltima briga de su 9 de freàrgiu, babbu e fìgiu patiollesos ant ochidu is calabresos.

A càrrigu de Joselito e Michael Marras is espertos de s’Arma de is Carabineris tenent medas indìtzios.

Is Ris de Casteddu e is incarrigados de is relievos dae su sostitutu procuradore Gaetano Porcu, ant esaminadu a sa minuda sa vetura de babbu e fìgiu in chirca de rastos e elementos pro acrarire s’òmitzidiu de is duos frades.

Sa proa prus importante est istada agatada in sa portiera de sa Fiat Panda de is bighinos de domo de Patiolla, in ue est istadu imbènnidu su sàmbene de Davide Mirabello.

Pròpiu su sàmbene de is duos frades, agatadu a presu de sa màchina brusiada e in s’istrada de Funtana Pirastu, at fatu pensare ca fiant mortos.

In su mentres is carabineris de sa bidda sunt sighende sa chirca de is càdaros de is calabresos in is sartos de Patiolla, agiudados dae is Cassadores de Sardigna, is militares de su Nonu Batallione, is unidades cinòfilas e moleculares, is pompieris e is subàcueos.