Internet, a su chi paret, pro more de s’emergèntzia de su coronavirus, diat pòdere tènnere unu blackout .
S’arriscu ddoe est, fintzas si non diat capitare in deretura. Medas sotziedades mannas de su setore sunt pighende privedimentos. Immoe in custu momentu, unu mundu sena servìtzios digitales e collegamentos ìnternet diat èssere unu problema mannu a beru.
Difatis sa pandemia mala de Coronavirus est donende impestu a paritzas natziones, cumprèndida s’Itàlia, chi sunt adotende polìticas de limitatziones e de isulamentu domitziliare de sa populatzione issoro.
Custu at cambiadu is abitùdines de sos tzitadinos, chi si sunt agatados a dèpere traballare dae domo, su matessi is pitzocos cun is fainas iscolàsticas.
Fintzas su tempus lìberu cun is essidas e is atividades in foras ant tentu una limitatzione manna, custringhende is persones a si desaogare cun recreos domèsticos.
Is istentos preferidos sunt: film e sèries televisivas in streaming, videogiogos e multiplayer in lìnia.
Su resurtadu est istadu unu nùmeru esageradu de cunnessiones a internèt cun unu solletzitu ispantosu de sa rete. S’UE est intervènnida dae pagu presentende su problema, e chirchende rimèdios pro preservare internèt e pro evitare su blackout.
Totu custu dipendet dae su fatu ca diat serbire unu afortziamentu adeguadu de sa lìnia internèt e de is mesuras pro cuntènnere s’impreu de sa banda larga.
Ma ite diat pòdere capitare? Unu blackout a matzas in su paisu Nostru e in su restu de su mundu. Essende chi sos bendidores printzipales, fornidores de sa lìnia internèt a cada abbonadu, ant programmadu unu servìtziu gestinde sas puntas màssimas in sas majores fàscias oràrias de sa die.
Difatis sa rete est istruturada pro suportare custos usos, chi acontessent mescamente in is oras de su merie e de sa note.
Cun s’intrada in vigèntzia de su decretu “iorestoacasa” de su 9 martzu, is dotzentes ant cumentzadu a fàghere letziones a is istudiantes issoro pro mesu de piataformas digitales, e in prus medas traballadores ant inghitzasu a traballare dae domo.
Atziones chi cumportant un’impreu continu de internet, in oràrios chi de sòlitu non sunt cussos isfrutados pro registrare cunnessiones de massa a volùmene artu.
Ite si diat pòdere fàghere pro evitare su maladitu blackout? Is gigantes de contenutos multimediales comente Netflix e YouTube, sunt leende provedimentos e pensant de propònnere a is persones cuntentos in SD ebbia e non prus in HD. Tra is sèberos leados in cunsideru dae s’UE, imbetzes, ddoe est su còmpudu de su tràficu internèt de ogna Istadu Membru.