A sa fine est istadu connotu e firmadu s’autore de sa fura acontèssida in su tzentru de Casteddu. Ma ispiegamus comente sunt andadas is cosas.
Sàbadu a merie, su personale de su tzentru cumertziale La Rinascente, at pedidu s’agiudu de un’echipàgiu de s’Iscuadra Volante, pro ite pagu prima unu pitzocu nd’aiat furadu una busceta a una fèmina e fiat istadu sighidu dae is guàrdias de seguresa de su tzentru.
Is Agentes, lòmpidos a su logu, ant iscurtadu su contu de una de is duas guàrdias giuradas chi ant postu fatu a su furone chi a dolu mannu, a pustis de èssere istadu firmadu, nche dd’at fata a si fuire in is caminos de sa Marina. Sa guàrdia giurada at notadu su pitzocu andende a segadas in is corsias de La Rinascente, finas a cando cun un’iscuta lestra, nd’at iscravadu dae is manos sa bursa de una fèmina e s’est fuidu.
In deretura dd’ant postu fatu is guàrdias chi sunt resèssidas a dd’atzaparee a nde ddi torrare a boddire sa bursa. S’òmine est istadu acumpangiadu a su tzentru cumertziale, ma candu at bidu is guardias unu pagu fidadas si nd’est torra fuidu.
Pensaiat de si dd’aere iscampugiada, ma a pustis de unas cantas dies at tentu una sorpresa pagu pragerosa pro issu.
Eris un’àteru echipàgiu de s’Iscuadra Volante, mutidu pro bisionare is immàgines de is telecàmeras postas a tutela de su tzentru cumertziale, at castiadu is registratziones e at connotu a M.D., casteddaju de 36 annos, giai connotu a is Fortzas de Politzia pro medas àteros pretzedentes.
A pustis de unu servìtziu de chirca atentu, s’òmine est istadu agatadu dae is fortzas de s’òrdine passigende paris cun àteros duos giòvanos in Bia de Meilogu. Deretu est istadu firmadu e cando is agentes dd’ant fatu bìere is provas craras contras de issu at dèpidu cunfessare sa responsabilidade de sa fura e, una borta acabados is atos de ritu, M.D. est istadu signaladu a s’Autoridade Giuditziària pro su reatu de irrobatòriu.