Un’ómine casteddaju est resurtadu positivu a su coronavirus in Lombardia. Immoe s’agatat ricoveradu in s’ispidale Sacco de Milanu, e sa famìlia sua puru est in cuarantena in sa tzitade lombarda.

Dae cussu chi si podit ischire, su primu sardu contagiadu de custu virus biàgiat meda intre Lombardia e Sardigna pro motivu de salude. In prus tenet fìgios minores e si pensat chi siat una persona gióvana.

Un àtera informatzione chi ischimus de s’infetadu est ca a Casteddu ddoe est istadu paritzas dies a oe.

In su mentrestempus, in Sardigna est operativa s’iscuadra aprontada pro fàghere fronte a s’emergèntzia de su coronavirus. Sa situatzione est a pustu e is istruturas regionales sunt a s’avèrtida pro ogna problema.

Su bilantzu provisòriu in Itàlia de sos contagiados – in sa giornada de oe – sighet a aumentare. Est lòmpidu a bintinoe su nùmeru de sos mortos – totus betzos o personas cun maladias – e agiumai a milli is ammalaidados.

Sos casos de su virus nomenadu Covid-19 sunt ispainende·si, immoe non sunt sete bbia sas regiones corpidas de custa maladia.

A Lombardia, Vènetu, Emìlia Romagna, Piemonte, Làtziu, Toscana, Sìtzilia e a sa provìntzia autònoma de Boltzanu si sunt agiuntas Ligùria, Marche, Campània, Abrutzu, Pùglia e Calàbria.

In custa situatzione de emergèntzia natzionale sunt lòmpende puru bonas noas: barantases contagiados sunt istados curados de su coronavirus.

Una notìtzia chi est de cunfortu meda pro totus, massimamente pro “s’infetadu nùmeru unu” – su primu casu signaladu in Itàlia – ricoveradu in s’ispidale Sant Matteo de Pavia.

In su repartu de is maladias infetivas, Mattia – custu su nòmene de su malàidu – est sighidu in terapia intensiva dae un’iscuadra de medas dotores.

Diat èssere unu resurtadu mannu arrèneschere a curare custu gióvanu de trintoto annos, pro sa vida sua e pro cunfortare sa Natzione e totu su Mundu.

Is dotores sunt curende·lu cun unu cumpostu de antibiòticos – impreados pro HIV, Epatite e Èbola – chi at dimustradu de pòdere firmare s’asséndida de sa maladia.

Valentina ,sa pobidda de Mattia, – issa puru contagiada – est prìngia manna e tra unu mese at fàghere partu.

Isperamus chi pro custa famìlia totu andet bene.

Su bilantzu de sos ammalaidados sighet a aumentare in Itàlia. Est lòmpidu a ùndighi su nùmeru de sos mortos – totus betzos o personas cun maladias – e treghentosbintiduos contagiados.

Sos casos de su coronavirus sunt ispainende·si dae su Nord a totu s’Itàlia. Sunt bator sas personas infetadas signaladas: unu in Sitzìlia – Palermo – , un’àteru in Ligùria – Alassio – e duos in Toscana.

In Ligùria su primu ammalaidadu est una fémina de setant’annos, imbetzes in s’ìsula sitziliana est una turista bergamasca resurtada positiva a su coronavirus. Custu est su primu casu atzertadu in Sud de Itàlia.

A tempos de oe sunt sete sas regiones corpidas de custa maladia: Lombardia, Vènetu, Emìlia Romagna, Piemonte, Làtziu, Toscana, Sitzìlia e in prus sa provìntzia autònoma de Boltzanu.

Sa Lombardia est sa regione chi istat peus: sunt prus de dughentos sos contagiados e una zona in provìntzia de Lodi est cungiada in barantena.

In totu su Mundu s’epedemia est lòmpida a prus de otantamìgia personas infetadas, in Tzina oramai sos casos sunt belle setantotomìgia.

No est meda de cunfortu su chi at naradu su capu de sa delegatzione de s’Organizatzione mundiale de sa sanidade in Tzina, Bruce Aylward. A Ginevra at afirmadu ca su Mundu no est capassu de parare fronte a su coronavirus.

Su Guvernu at afortiadu sos controllos e su personale mèdicu in sos aeroportos de Roma Fiumicino e Milanu Malpensa est istadu aumentadu.

In prus sunt istadas firmadas sas gitas de iscola fintzas a su 15 martzu e suspéndidos esàmines pro otènnere sa patente pro ghiare in Lombardia, Emìlia-Romagna e Vènetu.

In su mentrestempus a Barcellona s’est ammalaidadu un’ispagnolu, chi est istadu in sas dies coladas in is regiones de su Nord Itàlia.

Su capu de su Guvernu Giuseppe Conte at naradu ca s’Itàlia est fàghende totu pro permìtere a sos tzitadinos suos de girare in su Mundu trancuillamente. Cun custos faeddos at cunfortadu sas Natziones istràngias, pro ite su Sistema de sa defensa de sa salude italiana est unu de sos mègius.

Oe atopu a su Ministeru de sa Salude: su Ministru Roberto Speranza at a chistionare de s’epedemia coronavirus cun su Cummissàriu UE a sa salude Stella Kyriakides, su Diretore Europa OMS/WHO Hans Kluge e su Diretore ECDC Andrea Ammon.