Pro mèdiu de sa realidade virtuale, Jang at pòdidu torrare a negussiare cun s’istimada fìgia Nayeon.
Custu est acontèssidu in unu documentàriu – I met you – trasmìtidu unas cantas dies a como dae sa sudcoreana Munhwa Broadcasting Corporation.
Cun unu visore ispetziale in 3D, sa fèmina at torradu a bìere fìgia sua, bènnida a mancare a sete annos in su 2016 pro more de una forma mala de leutzemia.
In unu mundu virtuale Jang at relatadu cun sa minoredda – una còpia cuncordada in modu realìsticu a beru – cun sa mama provada meda dae s’emotzione.
A palas de su visore 3D sa fèmina no at pòtzidu poderare sas làgrimas e cun sas manos suas at sighidu totu s’ora a frandigare sa chi pariat sa pipia sua.
S’adòbiu est istadu aprontadu in un’istùdiu televisivu. Pro mèdiu de sas aparechiaduras de sa realidade virtuale, Jang chi s’est pòdida imbèrghere in unu àteru ambiente.
Prima in unu pradu, in ua at intesu sa boghe de sa fìgia chi dd’est obiada riende, e at incumentzadu a comunicare gràtzias a de s’intelligèntzia artifitziale. A pustis s’est sèida cun Nayeon a dae in antis de una turta de cumpleannu e sa pipia nd’at istudadu sas candelinas. Posca totu e sas duas si sunt postas a cùrrere in unu pradu, acumpangiadas dae un’unicorru coloradu. Infines sa mama at postu sa fìgia in su letu pro si dormire.
Custu est istadu s’ùrtimu momentu de afetu tra mama e fìgia, cun una mariposa lughente chi s’est posta subra sa pitzinna. In una furriada de ogros Nayeon est isparida in mesu a una lughe illuinadora.
A pagu tretu dae issa, sos parentes e sos amigos pranghende ant bidu sas pròpias immàgines chi bidiat peri Jang in sa realidade virtuale.
Su filmadu curtzu de deghe minutos de su documentàriu, pubblicadu in YouTube, in pagas dies est lòmpidu belle deghe milliones de visualizatziones.
Sa fèmina cumòvida at nadu de èssere cuntenta de àere bìvidu cust’esperièntzia.
A livellu de ètica, custu biàgiu in sa realidade virtuale est una cosa positiva o negativa? Una chistione chi seguru at a dividire s’opinione pùblica. Un’iscenàriu totu nou pro sa tecnologia, chi chircat in carchi modu de s’ispìnghere semper prus addai.
Totus diant bòlere colare pro s’ùrtima bia una die cun una persone cara chi est bènnida a mancare, ma fortzis diat èssere mègius a pòdereare sos regordos e s’esèmpiu chi nos at lassadu, custu ddu diant bòlere peri sos chi non nche sunt prus.