S’ispàtzu sotziale diventadu virale naschidu in Tzina, est presente in chentuchimbanta natziones, traduidu in setantachimbe limbas e iscarrigadu dae prus de 1,5 miliardos de impitadores.
TokTok est conchistende semper de prus s’Italia. Dd’at nadu sa sotziedade Comscore ammustrende is datos dae cabudanni a onniasantu 2019.
S’impreu de s’ispàtziu sotziale tzinesu at aumentadu a tres boltas, cun is impitadores colados dae 2,1 miliones a 6,4 miliones. Pro unu totale de prus 202% de aumentu.
Gióvanos e mannos sunt faghènde·si ingangulitzare dae custa aplicatzione, impreada dae gente de diferente edade.
Puru is polìticos e is personalidades de su sport ant incumentzadu a tènnere unu profilu in custu ispàtziu sotziale pro ite ant èssere prus is ocasiones de èssere sìghidos.
In Itàlia – cunforma a is datos bogados a campu dae is meres s’aplicatzione tzinesa in mese de idas – sa gente at pubblicadu in mèdia 236 vìdeos a su minutu, mescamente a ora de pràngiu e a is oto de sero.
Sa resèssida de TikTok dipendet dae fatu ca faghet a pònnere vìdeos curtzos de trinta segundos ebbia paris cun sa sa mùsica. In prus is meres de sa sienda sunt fàghende investimentos mannos pro isvilupare s’aplicatzione.
Comscore at calcoladu ca su tempus chi passant is italianos in custu ispàtziu sotziale at crèschidu de su 75%. Bastat custu datu ebbia pro cumprèndere ca pòdet causare dipendèntzia, pro ite cullunat a chie ddu imprat a s’abbarrare a tot’ora faghende video.
Sighende gosi, TikTok nche dd’at a finire a superare is àteras retzes sotziale famadas comente facebook e instagram. S’aplicatzione tzinesa no est solu una genia de karaoke virtuale, in ue sa gente si ponet a cantare, baddare e a istròchere is iscenas de unu film, est puru unu modu nou de presentare is cosas, chi paritzos meres de siendas ant cumpresu. Ca gràtzias a Tik Tok podent tènnere medas ocasiones in prus de aumentare su giru de is afares issoro.