Bonas noas dae sa Sardigna. Est naschidu unu laboratòriu e un’archìviu agiornadu in ue est arrimadu su dna de totus is bingedos sardos.
Su méritu est de duos chircadores tàtaresos de su grupu de traballu de biologia moléculare de Agris Sardinia: Maria Pia Rigoldi e Alessandra Frau.
At a èssere un’istrumentu ùtilosu meda pro agiudare is siendas sardas a connòschere e a megiorare sa produtzione de binu.
In custos annos Agris at donadu un’agiudu mannu a su giassu internet Italian Vitis Database. Cun su progetu Akinas at cuberadu e istudiadu noranta bingedos sardos. Custu traballu est istadu diretu dae Gianni Lovicu.
Is chircas portadas a in antis dae is duos chircadores sardos, Frau e Rigoldi, ant permìtidu de agatare sa presèntzia de unu profilu genéticu ùnicu, e a pustis de unu traballu istentosu, ant iscobertu ca s’agatant bingiales nàschidos e pesados feti in Sardigna.
Is dotoras ant isuladu duamìgia (2000) profilos genéticos de bingedos europeos e mediterraneos, a pustis ddos ant ghetados a pare cun sos datos de bingedos cortivados e agrestes. Gasi ant cuncordadu una banca de datos lestros a ddos compudare, a servitzìu de is siendas isulanas chi produint binu.
Custu sistema at permìtidu de currègere is connoschèntzias isballiadas de is bingedos, tramandadas in su tempus dae su babbu in fìgiu. In prus s’est fata craresa a pitzu de su nùmene de is ispètzias de bingiales e s’orìgine issoro.
Immoe tocat a valorizare custa richesa manna, ca is bingedos sardos diant èssere un’ocasione de isvilupu pro medas logos de sa Sardigna.
Si diat dèpere rimediare a sos dannos fatos in su tempus coladu, cando medas ispètzias si sunt ispèrdidas pro is pestas o pro more ca nd’ant tiradu is bìngias.
Unu traballu mannu e importante, cussu fatu dae s’iscuadra biologia moléculare de Agris Sardigna, chi unu incras s’at a apretzare meda de prus.