Su Casteddu at cuncuistadu unu puntu a Brescia, gasi a sa fine est arrenèschidu a andare a in anti in sa classìfica.
Tzertu, su Casteddu no at giogadu bene comente in is meses colados, ma s’est torrada a bìdere un’iscuadra prus unida e gherradora.
Su Brescia est caladu in campu pro bìnchere sa partida giogada in domo e s’est dimustradu un aversàriu istragosu, comente in su primu atopu de campionadu.
Sa partida s’est posta a lestru bene pro is ruju-blu, cun una rete marcada dae Joao Pedro: unu corpu de conca a pustis de su servìtziu de Cigarini.
Is rundineddas ant arrespostu cun duas retes de Torregrossa – giogadore in die ditzosa – a in antis de conca cussu puru, e a pustis cun una calada de pee dae tesu.
Is sardos sunt torrados tene pro tene cun unu rigore iscutu dae Joao Pedro.
Cando sa partida fiat galu aberta a ogna resurtadu e coigiaiant deghe minutos a s’acabbu, su Brescia est abbarradu cun unu ómine de mancu. A pustis Balotelli, intradu de pagu, si nch’est fatu bogare dae s’àrbitru pro is chèscias suas, a pustis de una calada de pee a conca de Pisacane. S’àrbitru Giua, gadduresu de Caragnani, at aplicadu a pilu e sinnu su regulamentu.
Su Casteddu, cun prus òmines, at àpidu duas ocasiones pro bìnchere sa partida, cun Nainggolan e Cerri, ma non ddas ant isfrutadas. Su 2-2 est unu risultadu giustu pro cussu chi s’est bidu in campu, chi at acuntentadu de prus su Casteddu chi non su Brescia. S’iscuadra de s’ex presidente ruju-blu Cellino sìghit a abarrare a coa de sa classìfica.
Domìnigu is casteddajos ant a giogare a Milano contra s’Internazionale. S’at a bìdere chi s’iscuadra at èssere prus cuntzentrada e chi at superadu sa crisi. E chie dd’ischit si at arrenèschere torrare sa presta pro su 4-1 patidu contra is nieddos-asulos chi sa chida colada nche ddos ant bogados in malumodu dae sa Copa Itàlia.