Est sa festa, non solu religiosa, prus importante de su mundu, a su mancu pro custa ala de su mundu de fide cristiana.
Is nuscos, is colores, is atmosferas, is decoratziones, is mesas aparitzadas, is amigos, is parentes, s’àrbore, is istrinas, s’àera de festa e fintzas Babbu Nadale. Sunt petzi una pariga de is cosas chi donant a custu perìodu de s’annu unu tocu fadadu.
Su brègiu, sa nostalgia e s’isperàntzia chi furriat cada momentu in carchi cosa de ispatosu.
Dae is annos 2000, est a nàrrere dae cando sa rivolutzione digitale at cumintzadu a crèschere a totu biore, est cambiadu fortzis calicuna cosa?
Internet, is mèdias sotziales, su cumèrtziu eletrònicu e is impriastos eletrònicos nostros ant influentzadu custa festa e su gosi mutidu “ispìritu de Nadale”.
Faghimus·nos una domanda: cantu est cambiadu su significu de su regalu in su perìodu de Nadale?
Fortzis diat bisongiare una iscoberta noa o ri-iscoberta de su “balore de su donu”. Unu regalu, cando ddu seberamus, ddu ponimus in un’iscàtula e in fines cando ddu donamus, contat carchi cosa de nois etotu.
Su donu podet èssere caru o de valore, ma a ogna contu is ogetos chi detzidimus de istrinare a su cumpàngiu nostru, a is caros nostros e a is amigos iscòviant medas cosas de su chi semus nois etotu.
Diamus dèpere èssere responsàbiles e cuscientziosos de custa genia de informatziones agiuntivas chi rapresentant una ispetzia de imbòddiu de su donu chi semus intreghende. Nos devimus domandare cale impressione bolimus donare de nois a is chi retzint su regalu nostru.
Cale est, in pagos foeddos, su contu chi acumpàngiat cada regalu chi faghimus?
Diamus dèpere torrare a iscobèrrere totus sa “dimensione de su donu”, pro evitare chi fintzas su Nadale si furrit in un’operatzione cumertziale ebbia e un’iscusa pro gastare dinare e comporare mertze ebbia.
Paris a s’istrina divimus regalare a nois etotu cun un’iscopu nòbile comente su de agiudare is àteros. Acò, fortzis est custu su donu giustu pro sa Pasca de Nadale.
Si non diamus a dèpere resessire a donare a nois matessi, non nos devimus disisperare, podimus suprire cun una categoria de donos chi non solu contat carchi cosa de nois, ma contat carchi cosa de sese.
Custas cosas sunt is libros: prendas prenas de bisos, de isperu e istòrias. Beras ghias pro s’orizontare in su mundu modernu.
Bidu chi semus in Sardigna, cunsigiamus duncas carchi cosa chi allegat de s’identidade nostra, prus mègius si iscritu in limba sarda. Bonas Pascas de Nadale a totus.