In unu vìdeu chi est diveninde virale (est girende in is printzipales canales social Youtube, Wathsapp, Facebook e Instagram) is legales barbaritzinos espressant e motivant sa firma contrariedade issoro a sa lege chi difatis abrogat sa prescritzione de su reatu a pustis de sa pronùntzia de sa sentèntzia emìtida dae su giùighe de su primu gradu.
In su vìdeu de belle chimbe minutos, 12 penalistas nugoresos ispiegant cun pagos faeddos ma bene lisados pro ite est pretzisu chi s’istitutu de s’òbligu subravìvat pro non cundennare su tzitadinu a dibatimentos eternos, sine die.
Una batalla de tziviltade duncas chi pro s’ora no at tentu perunu ascurtu dae su prus de is partidos de Guvernu chi difatis finas a custu momentu no ant donadu crobba a sa recherta de is penalistas italianos de firmare sa norma noa a pitzu de sa prescritzione.
Is ùnicos partidos chi sunt donende coddu a sa batalla de is penalistas italianos sunt cussos de s’opositzione (Forza Italia, Lega e Fratelli d’Italia) e in sa magioràntzia su Pd.
Tando, bidas is cosas comente sunt, su provedimentu at a divenire lege dae su primu de ghennàrgiu de su 2020 cun cunsighèntzias graes pro is abogados penalistas italianos impinnados in una chèscia unitària a livellu territoriale (astensione dae is udièntzias) e in Roma (acanta est in cursu sa maratona oratòria) contra una riforma chi at a furriare su protzessu penale in unu protzessu sena fine.
Pro custu una delegatzione de sa Càmera Penale de Nùgoro ghiada dae su presidente Salvatore Murru, e dae is collegas Angelo Magliocchetti, Fabio Varone e Paola Marteddu at asseguradu pro sàbadu su 7 de mese de idas, sa partetzipatzione de su foru barbaritzinu a sa “Maratona oratòria pro sa beridade subra sa prescritzione” in Roma, in Pratza Cavour (cara a sa Corte de Cassatzione) incumentzada lunis su 2 de nadale e chi at a durare finas a sàbadu su 7 de nadale.
Un’atòbiu pro contare a s’opinione pùblica sa beridade a pitzu is càusas de sa durada sena sentidu de is dibatimentos e de comente amus a divenire totucantos presoneris a vida de s’Istadu cun s’abolitzione de sa prescritzione. Chentinas de abogados de totu Itàlia dae is 9 oras de mangianu a is 8 de merie ant a contare a is tzitadinos su chi càpitat a beru in is àulas de is tribunales ogna die.