In Sardigna, is istruturas pùblicas o privadas acreditadas comente naschidòrgios sunt 13. Su 23,1% respetat su valore de riferimentu atatzadu a 1000 partos, imbetzes su 38,5% non respetat su valore mìnimu de 500 nàschidas a s’annu. (In s’editzione pretzedente, riferida a s’annu 2016, is istruturas fiant 17.
Su 18% respetaiat su valore de riferimentu fissadu a 1000 nàschidas imbetzes su 53% non respetaiat su valore mìnimu de 500 nàschidas a s’annu).
In sa Regione, in is primas positziones si cunfirmant su Policlìnicu de Pauli de Casteddu (cun 1.725 partos fatos in su 2017), s’Ispidale Santìssima Trinidade de Casteddu (1.399 partos), s’Istabilimentu Clìnicas San Pietro – AOU de Tàtari (1.158 partos).
Sighint s’Ispidale Giovanni Paolo II de Terranoa (SS) (976 partos) e s’Ispidale San Francesco de Nùgoro (917 partos).
Su regulamentu de su Ministeru de sa Salude in is standard cuantitativos e calitativos de s’assistèntzia ospedaliera fissat is valores màssimos relativos a is partos tzesàrios primàrios a su 25% (pro is ispidales chi faghent prus de 1000 partos annuales) e a su 15% (pro is ispidales chi faghent prus pagu de 1000 partos a s’annu). S’ùnicu ispidale chi rispetat su lìmite ministeriale, in Sardigna, est s’Ispidale Santìssima Trinidade de Casteddu.
“Rispetu a su partu vaginale, su partu cun trincu tzesàriu cumportat prus arriscos pro sa fèmina e pro su pipiu, pro custu diat tocare a ddu gàghere petzi in presèntzia de inditos maternos o fedales ispetzìficos”, ispiegat Elena Azzolini, mèdicu ispetzialista in Sanidade Pùblica e cumponente de su comitadu iscientìficu de www.doveecomemicuro.it.
E tando, in ue tocat a fàghere partu in Sardigna?
In su giassu www.doveecomemicuro.it si podet agatare sa classìfica regionale de is puntos de nàschida prus mègius pro nùmeru de partos. A conchistare is primas positziones sunt su Policlìnicu de Pauli de Casteddu, s’Ispidale Santìssima Trinidade de Casteddu, s’Istabilimentu Clìnicas San Pietro – AOU de Tàtari, s’Ispidale Giovanni Paolo II de Terranoa e s’Ispidale San Francesco de Nùgoro.