Segundu postu in s’importante cuncursu pro sa “II Editzione de su PRÈMIU Giòvanos – SIRA 2018 Mègius Tesi in Restàuru Architetònicu” pro sos tres istudiantes de s’Universidade de Casteddu Marta Barrui, Stefano Tavera e Alessandro Murgia.
Si fiant iscritos in su mese maju de su 2018, cunsigiados dae sa reladora Donatella Rita Fiorino, cun una tesi de 500 pàginas a tìtulu “Mesue Anàlisi Restauro, Stùdi interdisciplinàri per il riuso del cumplesso monumentale de San Giuseppe a Cagliari”. Sàbadu 22, in ocasione de su Cunvegnu Natzionale SIRA 2018 “Restàuru. Connoschimentu, Progetu, Cantiere, Gestione” acanta su Dipartimentu de Architetura, Iscola de Ingegneria e de Architetura de s’Universidade Alma Mater Studiorum de Bologna, s’èsitu finale. Bene 100 sas tesis presentadas.
Sos tres ant retzidu su prèmiu sàbadu coladu dae su presidente de sa Sotziedade Italiana pro su Restàuru de s’Architetura Stefano Musso. Presentes, sa reladora Donatella Rita Fiorini, una platea de dotzentes e chicadores de restàuru italianos e sos membros de sa giuria esaminadora presidida dae Eugenio Vassallu e assentada dae Francesco Trovato, Paolo Mascilli Migliorini e Maria Paola Borgarino.
«Semus contento meda» at decraradu Marta Barrui a nùmene de totus e tres «non nos isetiamus custu resurtadu. S’isperu nostru est a sighire, chi custu non siat unu prèmiu siat un’imbitzu a otènnere semper de prus. Chi nos diat fintzas possibilidade de agatare traballu».