S’Unione de is comunos de s’Ogiastra at comporadu 4 màchinas noas pro su Corpu de Politzia Locale, si tratat de una Renault Clio e 3 Fiat Panda.
S’acuistu est istadu netzessàriu pro more de is dannos causados a su parcu auto de sa Politzia locale a pustis de s’atentadu intzendiàriu. Su corpu de Politzia Locale esèrtzitat sa funtzione pro contu de is Comunos de Elini, àrthana, Lanusè e Loceri (Barì at deliberadu pro su retzessu de sa cunventzione).
Pro s’ora is guardia munitzipales sunt in totu 12, 3 a tempus determinadu, e un’eade mèdia de 52 anns. Is còmpitos issoro, in prus de su controllu de su tràficu, sunt sa vigilàntzia edilìtzia, sa lota contras a s’abbandonu de is refudos, sa seguresa in is festas, manifestatziones e protzessiones religiosas. A totu vustu s’est aciuntu finas s’emergèntzia de sa Limba Bleu, e duncas, is guardia, in casu de pidèmina, depent èssere presentes cando is pegos malaidos benint tudados pro sa verbalizatzione.