Sas prus famadas las connoschides totus: Santu Antiogu, Santu Predu , Sa Maddalena, Caprera, Asinara e Tavolara. Sa chi medas no ischint est chi in Sardigna, a parte sa terra mama, nche tenet 227 ìsulas, tzensidas dae su situ de radioamadores “Italian island awards”, chi contat in totu Itàlia at contadu su totale de 766 ìsulas. Duncas, sa Sardigna est sa regione prus rapresentada.
S’arcipelagu de Sa Maddalena contat su bellu de 65 ìsulas e isuleddas, ma sa boghe grussa, si puru in unu territòriu meda de prus mannu, la faghet sa Gallura cun 74 isuleddas. 14 sunt tra su s’ex Ptovìntzia de Nùgoro e s’Ogliastra, 17 in su tataresu, 12 tra Campidanu e Planargia e 45 in su Sulcis Iglesiente e Gerrei. Sas prus mannas sunt in òrdine Santu Antiogu, Asinara e Santu Predu.
In su contu bi sunt fintzas sas ìsulas in mesu a sos lagos, duas, s’Ìsula de Monte Paza (Omodeo) e s’Ìsula de su s’Artu Flumendosa. Ma s’istòria prus originale abarrat cussa de s’Iscògliu de su Pastore, a largu de sas ìsulas de Sa Baca e de su Trau, chi est istada isciusciada completamente in un’ esercitatzione militare de sa fine de s’800. Si tratat fortzis de s’ùnica ìsula italiana iscumparta pro manu de s’òmine.