Ses annos de afitu de s’aeroportu de Tortolì in arretradu. Sa Gearto at a dèpere torrare a s’AliArbatax una tzifra considerevole.
S’AliArbatax, sa sotziedade famanda de s’aeroportu de Tortolì, at bintu s’arbitradu contra sa Gearto, sa sotziedade de gestione de s’aeroportu de su Grupu Mazzella, pro una tzifra chi superat de meda sos 3 milliones de èuros.
Sa solutzione de sa pelea cun s’arbitradu fiat prevìdida in su cuntratu de afitu e chenàbura pròpiu custu at postu sa paràula fine a sas brigas tra sas sotziedades. Sa sentèntzia at fato torrare su risu a s’AliArbatax.
A dare sa noa eris est istadu Mario Murru, vitze presidente de su Cunsòrtziu Industriale ogiastrinu (cunsòrtziu sotziu ùnicu de AliArbatax). Su collègiu àrbitrale presididu dae s’abogadu Anna Maria De Montis at atzertadu chi Gearto est depidora in sos cunfrontos de AliArbatax de sos cànones de afitu pro s’usu de s’aeroportu dae su 2008 a su 2014 pro un’ammontare de belle 4 milliones de èuros.