Matteo Gregorio, mesu campanu e mesu casteddaju, ma oramai tortoliesu de adotzione, est impinnadu comente sucurridore navale a Samos, in su mare Egeo. Cun sos cumpàngios suos, agiudat die e note sas persones chi si fuint dae sas gherras rugrende su mare cun imbarcatziones de fortuna. S’ìsula difatis est sa prima frontera de s’Europa pro chie si fuit dae fàmene e gherra.
Eris sero in Italia Uno, durante sa puntada de su programma famadu Le Iene in prima serada, est istadu mandadu in direta unu servìtziu de Gaetano Pecoraro, chi at coladu una note intrea cun sa guàrdia costera italiana chi, a largu de s’Egeo, partètzipat a sa Poseidon Rapid Intervention, una de sas missiones de sucursu internatzionales prus importantes coordinada dae Frontex.
S’imbiadu at descritu custos “ànghelos de su mare” chi afrontant in primu lìnia custu apretu umanitàriu terrorosu e chi ant giai sarvadu mìgias de vidas. Tra sas caras de custos pitzocos balentiosos, a sos ogiastrinos no est isfugidu cussu de Matteo Gregorio, chi durante sas oras est coladas in mare abertu cun s’imbiadu, at contribuidu a sarbare deghinas de migrantes bènnidos de Pakistàn e Sìria, tra issos medas pipios.