S’initziativa “Un fiocco arancio per l’Ogliastra” naschet cun sa punna de unire sa populatzione ogiastrina, contra sos provintzialismos e sas disamistades tra sas biddas, in nùmene de unu disìgiu comunu: su de sarvare sos servìtzios de su territòriu nostru.
“Custa batalla est a dda gherrare totu paris, a manu tenta. Est pro custu chi semus cuntentos de collaborare cun sos amigos de “Giù le mani dall’Ogliastra” e cun su comitadu de sas mamas, unende·nos a su boghe issoro contra su provedimentu chi chircat de nos apetigare” ispiegant sos organizadores de s’initziativa.
“Pro custu pedimus a totu sos amigos nostros de partetzipare a sa manifestatzione organizada dae Giù le mani dall’Ogliastra pro su 5 de martzu 2016 e pro s’ocasione de si pònnere nu frocu ARANTZU sìmbulu de sa fortza nostra e sinònimu de sa gana nostra de resistire. Pedimus sa partetzipatzione de totu sos tzitadinos, de sos traballadores e de sos cummertziantes, ma mescamente de sas iscolas pro ite custa batalla andat gherrada e andat binta prus che totu pro issos, sos giòvanos nostros, u benidore de custa terra meravigiosa”, pedint sos organizadores in sos mèdios sotziales.
In isetu de sa manifestatzione de su 5 martzu ,su profilu facebook “Un fiocco arancio per l’Ogliastra” est istadu prenadu de foto de sos ogiastrinos chi sunt aderinde a sa protesta: istudiantes litzeales, pitzocheddos, professionistas, mèdicos e infermieris, mamas de totu Ogliastra. Finas dae s’Ispidale Santu Frantziscu de Nùgoro sunt arribbadas foto a suportu de sa nòbile iniziativa ogiastrina.