Consumos esagerados e pressione de s’abba suspeta in is cundutas de s’abba de Baunei e de Triei
Ivan Marongiu
Controllos de Abbanoa pro iscobèrrere chie furat s’abba.
In is ùrtimas dies de maju is acuedutos de Baunei e de Triei ant meda tènnidu problemas de pressione causados dae furas sighidas de abba. Is tècnicos de su gestore ùnicu pro custu ant inghitzadu unas indàgines pro iscobèrrere is autores. Is funtaneris ant averiguadu chi ogna segundu benint boddidos a manera illìtzita prus o mancu 2 litros de abba, unu dannu mannu pro s’ente ùnicu ma finas pro is bidditzolos de Triei e de Baunei chi, mancari paghende, non podent godire de unu servìtziu bonu e sighidu. Finas a como is operajos de Abbanoa no ant agatadu galu su responsàbile e ant petzi fatu denùntzia a is carabineris de Baunei. Chie si siat arriscat finas sa galera pro fura, ma peri pro dannos e interrutzione de sa frunidura de s’abba potàbile.
