Un’acòrdiu interistitutzionale tra is Comunos ogiastrinos, Provìntzia Ogiastra e Regione Sardigna, custa est sa proposta de su sìndigu de Gàiru, Roberto Marino Marceddu, in una lìtera aberta indiritzada a is sìndigos a su Presidente de sa Provìntzia, a is consigieris regionales, a is partidos e a is sindacados ogiastrinos, a is assòtzios, a is organizatziones e a totu is tzitadinos. A bisu de Marceddu, pro arrèere sa derrota de s’Ogiastra no est a isetare a is bandos programmàticos noos UE 2014-2020 de s’Unione Europea ma, comente est essidu a campu dae is addòbios de su Coordinamentu de is sìndigos, est pretzisu a inghitzare sa sighente atividade:
1. Regorta de istrumentos de pianificatzione acumpridos fintzas a como in su territòriu, isfrutende finas sa disponibilidade donada dae sa Diretzione Urbanìstica de sa Regione;
2. Interessamentu de is Sìndigos pagu ativos o semper ausente in su Coordinamentu, de is consigieris regionales de su territòriu, de is fortzas sotziales, de is sòtzios presentes in Ogiastra, etzètera, pro more de fàghere un’acòrdiu interistitutzionale vinculante pro is partes interessadas, gosi comente prevìdidu pro is àtera àreas de sa Sardigna chi sunt in crisi;
3. Elaboratzione a òpera de totu cantu su territòriu, a manera unitària, de una proposta de “Progetu pro s’Ogiastra”, ogetu de s’acòrdiu mentovadu in su puntu pretzedente e finalizada a s’insertada in unu Programma Operativu ispetzìficu pro s’Ogiastra, a manera preventiva a s’inghitzu de sa Programmatzione UE 2014-2020.
4. Organizatzione de un’addòbiu in is primas 15 dies de su mese de abrile 2013, sinergia intre sa Provìntzia e su Coordinamentu de is Sìndigos, a sa cale est pretzisu cumbidare totu is atore locales, in vista de s’inghitzu cuncretu de is atzione mentovadas.
5. Inghitzu de is cuntatos imbenientes cun su Ministru Barca (o de su chi at a bènnere a pustis de issu) pro averiguare sa possibilidade de un’Acòrdiu Interistitutzionale finalizadu a s’acumprimentu de su Progetu pro s’Ogiastra.
