Sa detzisione de su Guvernu natzionale de portare a dae in antis de sa Corte Costitutzionale sa lege de is assuntziones temporàneas in is cantieris comunale e in is cantieris birdes at causadu sa reatzione pronta de su consigieri Regionale de su PdL Angelo Stochino chi, in unu comunicadu a is giornales at naradu: «Custu provedimentu nde leat su pane de buca a cussos disocupados chi gràtzias a is cantieris comunales ant pòdidu mantènnere is famìllias issoro ». S’ispera de Stochinu est chi s’assessore de is Entes Locales, paris cun su Consìgiu de is Autonomias, si movant pro aprontare unu Disegnu de Lege nou, pro more de sarvare is cantieris birdes e is cantieris comunales. Su consigieri regionale at finas propostu chi, si in casu no bi siat àteros rimèdios, est pretzisu brincare ogna impèdumu guvernativu donende in afidamentu is cantieris a cooperativas formadas dae is disocupados etotu. In custa manera s’at a pòdere istransire s’opositzione presentada dae su Guvernu a sa Corte Costitutzionale.
