Tendèntzia positiva pro su nùmeru de is residentes de Tortolì, chi ocannu s’at agiudicadu su primu postu in sa classìfica de is tzentros urbanos cun crèschida annuale prus arta: difatis, sa populatzione tortoliesa est aumentada de su 0.61% in unu annu ebbia e, oe in die, bivent in Tortolì e in sa fratzione de Àrbatax, 11019 abitantes, 5477 òmines e 5542 fèminas. In unu perìodu in ue is biddas sardas depent fàghere is contos cada die cun su problema de s’ispopulamentu, causadu dae una forte emigratzione chi interessat prus che totu is giòvanos, s’aumentu de is residentes in sa Comuna de Tortolì est una grandu cosa! Dae su 2008 a oe sa crèschida est istada de su 3.86%, gràtzias peri a sa presèntzia de 169 tzitadinos extracominitàrios. Custos datos, chi fàghent pensare in bonu, faghent praghere meda a su Sìndigu Domenico Lerede, chi, peri a nùmene de sa Giunta Comunale, at espressadu totu su cuntentu suo pro su resurtadu positivu chi sa tzitade at logradu: “Su territòriu at otènnidu unu resurtadu importante- at decraradu Lerede- mancari custu non siat unu momentu bonu, Tortolì sighit a èssere unu logu in ue istràngios e abitantes de is biddas chi sunt a làcana bolent bènnere a bìvere. Custos resurtados indànimat s’Amministratzione a sighire a traballare in custa diretzione, pro ite chi sa gente de foras bolet pigare sa residèntzia in Tortolì est pro more ca in custa tzitadina si bivet bene. Su bonu resurtadu chi amus cunsighidu ocannu nos donat sa fortza de andare a dae in antis cun prus gana e a traballare totus in paris pro parare barra a is isfidas de su tempus benidore”.
