Su de is trasportos in Sardigna est un’argumentu dìligu meda, dae semper. Pagos, male organizados e caros che fogu. Mancu male chi in custas dies dae su Consìgiu Regionale sunt lòmpidas bonas noas. E, intendide totu cantos, custas noas pertocant is giòvanos (dae semper is prus danneficados). Sa noa, dereta dereta de bessire, faghet tènnere ispetu bonu: is pitzocos e is pitzocas dae 14 a 27 annos ant a biagiare de badas in is naves de sa Flota Sarda S.p.a. Custa cumpangia de navigatzione noa est istada chèrfia dae sa Regione Sardigna pro more de chircare de isfrancare s’ìsula nostra dae s’egemonia istòrica de sa Tirrènia. Sa summa istantziada pro permìtere a is prus giòvanos de si pòdere ispostare sena ispatzare mancu unu soddu cun is traghetos regionales, dae sa Sardigna e bie sa Sardigna, est de 2 miliones de èuros. Custa, mancari pitica, est una rivolutzione de importu mannu pro sa terra nostra, pro ite at a fàghere a manera chi mìgias de pitzocos e pitzocas potzant biagiare cun fatzilidade, sena pensamentos e sena isetare a is ofertas raras o a su perìodu de eletzione pro torrare in sa pàtria issoro.
