Dae semper sa cultura est istada un’istrumentu de importu mannu pro su favoressimentu de s’unione e de s’integratzione tra pòpulos chi bivent in logos diversos de su mundu. Est prus che totu sa poesia chi tenet custu podere pro ite, gràtzias a issa, si podent espressare siat pensamentos personales, siat cuntzetos de valore universale.
Est pro custa resone chi sa Comuna de Elini at cumentzadu unu pianu de collaboratzione culturale cun Artenara, bidda de is Ìsulas Canàrias in ue cada annu si faghet una rassigna poèticu-literària de grandu importu. Unu primu passu de custa cooperatzione s’est tentu sa chida colada, in ocasione de sa rassigna “Poetas entre islas Canarias & Cerdeña” , chi s’est tenta tra Las Palmas e Tenerife, cun sa bìsita culturale de su poeta argentinu Gabriel Impaglione e de sa cumpàngia sua Giovanna Mulas, iscritora de Lanusè. Su ligàmene tra Artenara e Elini, formalizadu in sa residèntzia munitzipale de sa bidda de is Canàrias su 12 de cabudanni, tenet s’iscopu de favorèssere is cuntatos culturales tra is duas biddas, chi mancari siant a largu meda una de s’àtera, si simbìgiant meda tra issas. Difatis ambas duas sunt in un’ìsula, tenent pagos abitantes, sunt biddas de monte e tenet una economia de tipu agru-pastorale. S’initziativa, fata cun s’agiudu de su Consoladu Italianu de is Canàrias, at a promotzionare is atividades literàrias e at a fatzilitare s’iscàmbiu tra is iscritores e is poetas de is duos paisos.