Est istadu pigadu comente unu giogu, un’esperimentu sotziale, finas una isfida. In beridade est petzi un’idea bona pro fàghere pensare a is persones, pro donare una impèllida a su sentidu de tziviltade de totus. Semus alleghende de una initziativa, intitulada “Boddi una tzica” (Raccogli una cicca), nàschida in ìnternet e chi, comente est giustu chi siat, at giai conchistadu unu muntone de gente. Is organizadores ant abertu unu grupu in facebook chi tenet custu nùmene, pedende a totus, su 5 de ladàmene, de regògliere una tzica de sigareta dae terra. Gabriele, su fundadore de su grupu nos at ispiegadu chi a custa manifestatzione podet leare parte chie si siat e in cale si siat logu de su mundu “Cherimus dimustrare – at naradu Gabriele- chi si is persones s’aunint in paris podent otènnere resurtados de importu petzi cun unu gestu piticu ma de grandu contu. Custa est una initziativa simbòlica, eja, ma si petzi una persone subra tres de is chi bivent in sa terra diat a fàghere gosi si diat pòdere libertare s’ambiente de prus de duos miliardos de tzicas”. Tando, su 5 de su mese de ladàmene faghimus totus un’atzione bona pro sa natura: boddimus una tzica: non costat nudda e est unu sinnu de ispera pro su mundu in ue bivimus!
