Chissai cantas notes Samuele Stochinu, trassadu de feminedda betza o de pedidore, est passadu in Elini, in cussu tretu de caminu chi dae S’Ortu de Mesu Bidda, oe Pratza La Marmora, colaiat fintzas a sa domo de Giuanni Demuru, su cumpàngiu suo de cando fiat isbandiende; petzi unos cantos metros, ma però cun sa timòria de esseret bidu de calicunu e de esseret connotu. In cussu matessi logu, pustis prus de norant’annos, cuss’atmosfera lègia, tremulosa, iscurida e frita, at a torrare a bìvere gràtzias a s’abilesa e a sa balentia de Gianluca Medas, chi chenàbura, su 7 de cabudanni, a is 9.00 de note, pròpiu in Pratza La Marmora in Elini, at a interpretare s’istòria sambenosa e disgratziada de su bandidu artzanesu Samuele Stochinu, leada dae su romanzu “Memòrias de su bòidu” (Memorie del vuoto), de Marcello Fois. S’atore casteddàiu, acumpangiadu dae is tres artistas de su grupu “Gastropod”, at a bogare a campu is fatos tristos de sa famada “Tigre de s’Ogiastra”, dae cando fiat pitzocheddu finas a sa morte sua, arcana e malassortada. S’ispetàculu, aparitzadu in paris a s’Assòtziu Fìgios de Arte Medas, est patrotzinadu dae sa Regione Autònoma de Sardigna e dae sa Comuna de Elini.
