Ogliastra Informa e Porto Cervo Racing in paris pro sa solidariedade

Comente totus ischent giai, sa Porto Cervo Racing s’interessat prus che totu de garas e de cumpetitziones isportivas, ma non totus fortzis ischent chi s’ocupat peri de voluntariadu e de solidariedade. Difatis, sàbadu 18 de austu is pilotas de custa iscuadra ant a èssere impignados in una regorta de fundos in favore de s’assòtziu irbonesu Ogliastra Informa.  S’adòbiu est fissadu pro is 11 de mangianu in sa Biblioteca Comunale de Irbono in ue at a èssere presentadu su programma a is mèdios de comunicatzione e a is giornalistas. Posca, a is 3 de merie, totus is partetzipantes ant a andare is sa zona industriale de sa bidda in ue is amantiosos de su rally ant a pòdere provare s’emotzione de sa velotzidade in pitzu de unas de is màchinas de s’iscuadra Porto Cervo Racing. Cun unu contributu piticu s’at a pòdere fàghere unu giru de pista a costàgiu de is mègius pilotas sardos e non solu. S’adòbiu est patrotzinadu dae s’Unione de is Comunas de s’Ogiastra, dae sa Provìntzia, dae sa Protetzione Tzivile e est apartitzada dae s’Iscuderia Porto Cervo Racing e dae Lanterna Corse Rally Team, cun s’agiudu de is voluntàrios de Irbono e de is aziendas de su logu.