“Dae custu mangianu a chitzo semus totus in trèulu. Nd’ant istrumadu su muru de inghìriu. Finas a pag’ora faghet nche fiant peri unos membros de sa Giunta Comunale ma si nde sunt andados pro ite ddis amus naradu sa beridade: ca si oe semus in custu istadu sa curpa est s’issoro. Difatis no ant galu aprovadu unu progetu PUC comente si depet e est pro custu chi Fiordalisi at cumentzadu a isciusciare pròpiu dae inoghe. Nois tenimus custa domo ebbia, tenimus fìgios piticos e non nos nde podimus andare dae inoghe. Est un’afrustu, nos intendimus solos, abbandonados e sena podere”.
Sa domo de sa famìlia Scalas est abarrada totu sa die inghiriada dae unu muntone de gente: politzotos, carabineris, giornalistas, curiosos e unas persones chi sunt preocupadas pro is domos issoro (abusivas etotu). Difatis su procuradore at prevìdidu chi in is dies imbenientes s’at a protzedire a nde istrumare finas is fràigos de Orrì e de Monte Gatu fatos sena peruna règula. Sa chistione de s’abusivismu, duncas, torrat a si fàghere intèndere, ponende in perìgulu s’òrdine pùblicu. S’amministratzione comunale de Tortolì, ghiada dae su Sìndigu Lerede tenet unu bellu problema de si pàschere. Tra una pariga de dies at a tocare a Barì, a Tertenia e a àteras biddas puru: Fiordalisi est donende.si de fàghere!