A pustis de àere ammajadu su pùblicu de su Cafè Literàriu de Àrbatax, Gian Giacomo Pisu lompet cun is chircas suas a Biddamanna Strisàili. Difatis, domìniga 13 de mau, in sa sala de is cunferèntzias de s’Hotel Orlando (in su Boscu de Santa Bàrbara), su presidente de s’Acadèmia de is Nuraghes at a acumpangiare a is presentes in unu biàgiu in su mundu de is sìmbulos e de s’esoterismu, a s’iscuberta de is segretos meledosos e trasseris de su pòpulu sardu antigu. S’at a allegare de sa flota Shardana (is sardos fiant unu pòpulu de navigadores?), de ritos arcàicos ligados a su cultu de s’abba, de is connoschèntzias astronòmicas de is antepassados nostros e massimamente de su linguàgiu universale. Custu, segundu Pisu, diat a dèpere èssere tentu in grandu cunsideru finas oe: difatis nos diat a agiudare a torrare a pigare cuntatu cun s’identidade nostra e a donare su valore chi mèritat a s’eredidade chi nos ant lassadu is antigos. De importu mannu at a èssere su cunfrontu tra su shamanèsimu e s’esoterismu de is sardos cun cussos de s’Oriente Estremu. Difatis, paris a Gian Giacomo Pisu, b’at a èssere peri Jo Azer, fisioterapista ayurvedicu e famadu shamanu e asceta orientale. Sa cunferèntzia est aberta a chie si siat dae is 18.00. Non mancades: at a èssere unu domìnigu aciseri e prenu de contenutos de valore.

Si est custituida in su notaju sa Delegassione po Poderare sa naschida de sa IGP porcheddu de Sardigna, e si est assemidada in manera uffitziale sa Delegassione Iscentifica, chi in sa prima assortida, fatta in Macumere, in s’agentzia de Contas, su 15 de Abrile, at tribagliadu po approntare, medas puntos de su regolamentu de produssione de custa saporitesa totta sarda.

S’intentu, preparare sos documentos chi serbint de presentare a sa Commissione Europea po alcansare su riconnoschimentu de s’arrennomini IGP e faghere naschere una delegassione chi tenzat commente faina printzipale cussa de creare un’unione de sos pastores, masellajos e sos trasformadores de s’eccellentzia sarda, chi potant ordiminzare una filera e dare unu fentomu balidu a su mercadu, po tottu cussu chi appartennet sas fases de pesadura e de trassa de sos porcheddos chi teppent andare a su mercadu.

A sa mattessi manera,bardare sa produsssione locale sarda dae su periculu de battire importassiones chentza controllu perunu, e duncas tutelare s’issida de su prodottu. Unu arminzu balidu puru po sos consumadores, chi ant podere tennere unu trattadore chi potat garantire supra su rispettu de unu regolamentu de produssione. Fases importantes meda, cussas de sa naschida de sas duas delegassiones.

Importante meda at essere sa retza de sos sardos in Italia e in su mundu: su motivu de sa presentzia in sa delegassione de Bustianinu Mossa, presidente de sa Fasi, sa retza de sos corriglios sardos in Italia.”Sos emigrados” si dant itte faghere in cust’intentu commente consumadores,sustenidores,ambasciadores, narat Mossa. Semus 2,5 miliones sos sardos fora de sa Sardigna, ispartinados in tottu su mundu.

Solu in Italia sa Fasi contat casi 30.000 iscrittos, in 68 delegassiones presentes in 12 regiones de s’Italia. Sa pius a mesudie est Ciampino. Su tzentru e su norti de s’Italia sunt su puntu de arribu menzus de operajos, pastores,sordados e istudiantes ligados in manera chi non si podet isligare dae sa cultura sarda chi prima de tottu est sa cosa de mandigare. Esist commente una venerassione de su porcheddu. E difattis partizas sunt sas initziativas chi tenent commente base custu prodottu pittitteri.

Tenimos po custu un’istruttura de negossiu de produttos de calidade funguda, a sa cale si diritzant sos sardos emigrados.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22