Su Project Financing est a su tzentru in custas dies de sa sanidade nugoresa pro s’inghitzu de un’àteru progetu importante. A dd’annuntziare est sa Asl in una nota: “Mancant sos ùrtimos detàllios a su cronoprogramma de sos traballos de sos cantieris, netzessàrios pro limitare a su màssimu eventuales discumbènios e crititzidades. In sos 36 meses imbenientes su Santu Frantziscu at  a devènnere un’ispidale a s’avanguàrdia”.

“Su project financing — sighit sa nota -, at a serrare a manera definitiva sa paràbola sua: pionierìstica, ammajadore e, a bias, gherrada”. S’Asl si referit a sos fatos giuditziàrios dèvidos a s’annullamentu in autotutela dae banda de s’ex cummissàriu istraordinàriu de s’Assl de Nùgoro, Mario Palermo, de su cuntratu firmadu dae s’assòtziu temporàneu de impresas (Ati), denumenada Polo Sanitàriu Sardigna Tzentrale — Sotziedade de Progetu s.p.a. (Pssc), acontèssidu in su 2016 a pustis de sos rilievos de s’Anac. Unu cuntratu istipuladu annos faghet e chi previdiat sa cuntzessione de sos traballos finalizados a sa ricualificatzione de sos presìdios ospedalieris de su distretu nugoresu, ultres a sa frunidura de totu sos servìtzios istrumentales non sanitàrios, de su balore de prus de unu milliardu de èuros pro sa durada de 27 annos.

Su Pssc aiat fatu denùntzia sa su Tribunale de Nùgoro cuntestende s’annullamentu de su cuntratu, e sighende a traballare. Duncas in 2018, sas ocurrèntzias de su project financing fiant istadas pigadas in manu dae sa diretora de s’Assl nugoresa, Grazia Cattina, chi cun unu traballu de grupu longu, suportada dae s’Àrea Tècnica Nùgoro-Lanusè e de s’Ufìtziu de su RUP de su Project Financing, aiat permìtidu sa ripresa de su diàlogu cun sa sotziedade e su cumpretamentu cunsighente de diversas importantes òperas cun s’achirimentu issoro.

A su matessi tempus chi sa diretzione de s’Assl sighiat cun sos traballos (si puru in su 2021 siat istada cummissariada in preparatzione de s’inghitzu de sa reforma sanitària noa), s’ex Cummissàriu istraordinàriu Ats, Massimo Temussi, a traessu de sos legales, at propostu a sa Pssc sa transatzione de un’acòrdiu deliberadu chi at prevìdidu su saldu a sa sotziedade de unu dèpidu pro sos traballos giai acumpridos, chi sunt istados licuidados, mentras sa sotziedade s’est impinnada a cumpletare sas òperas de edilìtzia pùblica intro 36 meses, e a s’agabbu essire dae sa gestione de sos servìtzios dados chi ant a èssere mandados in custa manera a gara noa.

Cun sa reforma sanitària e sa nàschida de s’Asl duncas, cussu cronoprogramma benit portadu a cumprimentu. “No esistet in s’ìsula Nostra un’ispidale cun sas caraterìsticas e sas potentzialidades de su Santu Frantziscu — at naradu su manager Paolo Cannas, chi no at mai cuadu s’apretzamentu suo pro s’ispidale prus mannu de su  Tzentru Sardigna -. E custu s’at a bìdere ancora de prus a traballos urtimados, cando a nde tènnere profetu at a èssere mescamente s’oferta sanitària, cun sa Meighina Nucleare, sos repartos rinnovados e modernos, de sa cale si podet giai bìdere s’anteprima in sos locales de su padillione DEA, Cardiologia — UTIC etc.”.

“Ma a tènnere profetu de su rinnovu — sighit concruit Cannas — at a èssere “s’umanizatzione” de sos ambientes ospedalieris. Mi refèrgios a totus cussos ispàtzios fintzas a immoe non impreados, chi ant a dare unu sentidu fintzas a s’intrada (hall) chi fintzas a como pariat tropu manna: ant a nàschere servìtzios cummertziales e de ristoratzione, ma fintzas de utilidade (comente a parruchieris), chi non s’agatant in perunu àteru ispidale de sa Sardigna, ma chi medas sardos ant tentu modu de apretziare in àteros ispidales– pùblicos e privados — de Itàlia e de Europa”.

 “Progetto finanziato con l’Avviso Pubblico IMPRENTAS annualità 2021-2022”

Claudio Ranieri est bistadu nomenadu Allenadore Gentleman de sa serie B 2022/2023 in onore de Gigi Simoni, retzinde su titulu gratzias a sas prefferentzias espressadas dae sos vinti allenadores de sa serie BKT. Custu riconnoschimentu arribat pustis de aere giai binchidu su premiu duos annos faghede, pigande su testimonzu dae Stefano Pioli, chi aiat binchidu s’annu prima.

S’integru de su premiu si est tentu in Milano, inube Ranieri at retzidu sa Torretta de San Siro, simbulu de unu premiu chi tzelebrat sos balores beros de su giogu de sa botza, in mesu de su cale, su Fair Play, chi s’allenadore de su Casteddu incarnat in manera tipu.

S’ordiminzu de su Premiu Gentleman, ideadu dae Gianfranco Fasan, cun s’azzudu de sa Lega Serie B, at bidu sa presentzia de sa famiglia de Gigi Simoni, paris a amigos e gasetteris comente Luca Tronchetti e Alberto Cerruti, e de su presidente de su Coni CRL Marco Riva.

Ranieri at espressadu s’ingraenzu sou retzinde su premiu a nomene de Gigi Simoni, deffinindelu un’omine mannu e evidentziande s’importantzia de su Fair Play in su giogu de sa botza e in s’isport in generale. Su presidente de sa Lega B, Mauro Balata,at bantadu Ranieri commente una figura istravanada de su giogu de sa botza in Italia, evidentziande su rolu sou de puntu de relata po sos giogadores e allenadores zovanos,tambene comente isparghidore de sos menzus balores isportivos.

Su premiu est bistadu dadu a Ranieri non solu po su sutzessu battinde su Casteddu in Serie A, ma mescamente po sa lessione de isportividade in sa finale Play off, inube at dimandadu a sos tiffosos suos de nde la finire cun sos allolojos e de tzacullimanare sos tiffosos de su Bari, mustrande rispettu mannu po sos ribales e favoressende s’isportividade in mesu de sas duas isquadras. Custu attua at corpadu tottu sos allenadores de sa Serie B, chi l’ ant premiadu commente su chi meritaiat de piusu in s’annu 2022/2023.

Gianfranco Fasan, s’ordiminzadore de su premiu, at bantadu Ranieri, non solu po custu attu de currettesa, ma puru po s’esempiu custante de lealtade e rispettu po su ribale, balores chi dant trauda positiva a su giogu de sa botza e a s’isport.

Su premiu Allenadore Gentleman “Gigi Simoni”, marcat s’incomintzu de s’edisssione numeru 29 de su Premiu Gentleman Fair Play, chi si at a tennere in s’iscola Militare Teuliè de Milano. At a presentare Massimo Caputi paris cun Laura Barriales e Giorgia Rossi, e at essere tzelebrada giobia 16 de maju e at biere s’assignadura de medas riconnoschimentos, in mesu de sos cales sos Giocadores Gentleman de sa Serie A e su premiu Gentleman Mario Morosini, dedicadu a su giogadore chi incarnat a su menzus su Fair Play in sa Lega B.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22